काठमाडौं । ‘राष्ट्र, राष्ट्रियता, धर्म, संस्कृति र नागरिक बचाऔं महाअभियान’ का संयोजक दुर्गा प्रसाईंलाई सार्वजनिक शान्तिविरुद्धको कसुरमा म्याद लिने तयारीसहित सोमबार मध्यराति भक्तपुरस्थित निवासबाट प्रहरीले पक्राउ गरेको छ।
आन्दोलनका निरन्तर घोषणा गर्दै आएका प्रसाईंलाई पक्राउ गरेपछि काठमाडौं उपत्यकामा सुरक्षा व्यवस्थालाई थप कडा बनाइएको छ। गिरफ्तारीपछि उत्पन्न हुनसक्ने प्रतिक्रिया र प्रदर्शनलाई ध्यानमा राखेर उपत्यकाका तीनै जिल्लामा सुरक्षाकर्मीको बाक्लो उपस्थितి देखिएको छ।
जिल्ला प्रहरी परिसर काठमाडौंका प्रवक्ता एसपी पवनकुमार भट्टराईका अनुसार प्रसाईंले सार्वजनिक शान्तिमा खलल पुग्ने किसिमका अभिव्यक्ति दिएको निष्कर्षपछि सार्वजनिक शान्तिविरुद्धको कसुरमा मुद्दा दर्ता गरी म्याद लिने प्रक्रिया अघि बढाइएको छ।
भट्टराईले भने, ‘अभिव्यक्ति स्वतन्त्रताको नाममा दिनु भएका केही वक्तव्यले सार्वजनिक शान्ति भंग हुने देखिएकाले अनुसन्धानका लागि म्याद लिएर अघि बढ्छौं।’
टेकुस्थित उपत्यका अपराध अनुसन्धान कार्यालय र जिल्ला प्रहरी परिसर काठमाडौंको संयुक्त टोलीले उनलाई पक्राउ गरेको हो। पक्राउपछि प्रसाईंलाई भद्रकालीस्थित प्रहरी हिरासतमा राखिएको छ।
उनको गिरफ्तारीविरुद्ध नागरिक बचाउ दलले आजै आन्दोलन गर्ने चेतावनी दिएपछि उपत्यकामा सुरक्षा थप कडा बनाइएको हो।
नागरिक बचाउ दलका महामन्त्री प्रेमकुमार थाम्सुहाङले प्रसाईंलाई भेट्न नदिएको र पक्राउ ‘राजनीतिक प्रेरित’ भएको दाबी गर्दै सडक आन्दोलनको तयारी भएको बताएका छन्।
प्रहरीले हाल उपत्यकाका जोखिमयुक्त स्थानमा अतिरिक्त सुरक्षाकर्मी परिचालन गरेको छ।
प्रकाशित मिति: मंगलबार, मंसिर ३, २०८२
