काठमाडौं । काठमाडौं प्रहरी परिसर भद्रकालीको हिरासतमा रहेका दुर्गा प्रसाईंलाई भेट्न पुगेका कानुन व्यवसायीलाई प्रहरीले रोकिदिएपछि विवाद सतहमा आएको छ।
भक्तपुरस्थित निवासबाट गएराति पक्राउ परेका प्रसाईंलाई आज बिहान भेट्न उनका कानुनी प्रतिनिधि प्रहरी परिसर पुगेका थिए। तर ‘माथिल्लो आदेश’ को आधारमा भेट्न नदिइएको अधिवक्ता विनोदमणि भट्टराईले बताए।
‘हामी कानुन व्यवसायीलाई भेट्न दिइएन। यो स्पष्ट रूपमा संवैधानिक अधिकारको उल्लंघन हो,’ अधिवक्ता भट्टराईले अनलाइनखबरसँग प्रतिक्रिया दिँदै भने, ‘यसबारे नेपाल बार एसोसिएसनले गम्भीर ध्यान दिन आवश्यक छ।’
संविधानको धारा २०(२) अनुसार हिरासतमा परेका व्यक्तिलाई आफूले रोजेको कानुन व्यवसायीसँग तुरुन्त सल्लाह–परामर्श गर्ने अधिकार प्राप्त हुने व्यवस्था छ। त्यस्तो परामर्श गोप्य रहने स्पष्ट उल्लेख छ। तर शत्रु राष्ट्रको नागरिकका हकमा भने यो प्रावधान लागू नहुने प्रष्ट छ।
यसैबीच, प्रसाईंको गिरफ्तारीविरुद्ध नागरिक बचाउ दलले आजैदेखि आन्दोलन सुरु गर्ने जनाएको छ। सो समूहले मंसिर ७ गते प्रदर्शन गर्ने घोषणा गरिसकेको भए पनि गिरफ्तारीप्रति विरोधस्वरूप आजै सडकमा उत्रिने तयारी गरेको छ।
प्रसाईंलाई २४ घण्टाभित्र रिहाइ गर्न माग गर्दै आज दिउँसो १:३० बजे सिडिओ कार्यालयमा ज्ञापनपत्र बुझाउने कार्यक्रम रहेको दलका अध्यक्ष माधव प्रसाद खतिवडा (माधव कल्पित) ले जानकारी दिएका छन्।
प्रकाशित मिति: मंगलबार, मंसिर ३, २०८२
