काठमाडौं । ‘मातृभूमि बचाउ’ अभियानका अभियन्ता दुर्गा प्रसाईँले जेन-जी आन्दोलनसँग जोडिएका घटनामा उच्चस्तरीय राजनीतिक तथा संस्थागत संलग्नता रहेको दाबी गरेका छन्। मंसिर ७ गतेदेखि सुरु हुने आन्दोलनका कार्यक्रम सार्वजनिक गर्दै उनले भदौ २४ गते सिंहदरबार, संसद भवन र सर्वोच्च अदालतमा आगजनी गराउने योजनामा तत्कालीन उच्च पदाधिकारीहरू प्रत्यक्ष संलग्न रहेको आरोप लगाए।
पत्रकार सम्मेलनमार्फत विभिन्न भिजुअल र अडियो सामग्री प्रस्तुत गर्दै प्रसाईँले तत्कालीन प्रधानमन्त्री सुशीला कार्की र गृहमन्त्री ओमप्रकाश अर्याल ‘जेन-जी अप्रेसन सेन्टर’ मार्फत सम्पदामा आगो लगाउने अभियानको निर्देशकमै रहेका थिए भन्ने दाबी गरे।
उनका अनुसार जेन-जी आन्दोलनको मूल नक्सा पश्चिमी मुलुकको सहयोगमा सञ्चालन भइरहेका एनजीओ–आईएनजीओ तथा बारबरा फाउन्डेसनजस्ता संस्थाले तयार गरेको हो। प्रसाईँले आन्दोलनमा घुसपैठ गरी गोली चल्ने परिस्थिति सिर्जना गर्ने योजना पनि पहिले नै तय भएको बताए।
यससँगै उनले पूर्वप्रधान न्यायाधीश कल्याण श्रेष्ठ, डा. गोविन्द केसी, त्रिवि पूर्वउपकुलपति केदारभक्त माथेमा, डा. अभिशेषराज सिंह, डा. सन्दुक रुइतलगायत व्यक्तिहरूको समेत भूमिकाको आरोप लगाए।
प्रसाईँले सार्वजनिक गरेका भिडिओहरूमध्ये एकमा ‘सिंहदरबार जलिसकेपछि मिशन पूरा भयो, धन्यवाद बालेन!’ भनिएको दाबी छ। उनका अनुसार भदौ २४ को आगजनी काण्डमा काठमाडौं महानगरका मेयर बालेन शाह, तत्कालीन रास्वपा सांसद डा. तोसिमा कार्की, सुमना श्रेष्ठ, जेन-जी अभियन्ता रक्षा बम, सुधन गुरुङसहित करिब १५ जनाको संलग्नता देखिन्छ।
प्रकाशित मिति: सोमबार, मंसिर २, २०८२
