काठमाडौँ । निर्वाचन आयोगले देशभर मतदाता नामावली दर्ताका कार्यमा देखिएको भीडभाड र नागरिकको उच्च चासोलाई मध्यनजर गर्दै दर्ता म्याद आणखी पाँच दिनका लागि लम्ब्याइएको जनाएको छ। आयोगले शुक्रबार साँझ विज्ञप्ति जारी गर्दै ३० कात्तिकमा सकिने भनिएको दर्ता समय अब ५ मंसिरसम्म खुला रहने जानकारी दिएको हो।
आयोगका अनुसार पछिल्ला दिनहरूमा देशका विभिन्न जिल्ला निर्वाचन कार्यालय तथा स्थानीय तहका नामावली संकलन केन्द्रहरूमा नयाँ मतदाता दर्ता तथा नाम अद्यावधिकका लागि उल्लेखनीय भीड देखिएको छ। नागरिकलाई थप सहजता प्रदान गर्ने उद्देश्यले म्याद बढाइएको जनाएको छ।
विज्ञप्तिमा आयोगले भनेको छ, ‘पछिल्लो समयमा मतदाता नामावलीमा नाम दर्ता तथा अद्यावधिक कार्यमा देखिएको उत्साहजनक सहभागिता र नागरिकको सहजतालाई ध्यानमा राखी आयोगको २०८२ मंसिर २८ गतेको निर्णयअनुसार दर्ता अवधि २०८२ मंसिर ५ गतेसम्म थप गरिएको छ।’
कसरी दर्ता गर्न पाइने?
म्याद थपिएको अवधिमा नागरिकले राष्ट्रिय परिचय पत्र प्रयोग गरेर वा पहिलेदेखि प्रयोगमा रहेको प्रि–रजिस्ट्रेसन सिस्टम मार्फत अनलाइन आवेदन भर्न सक्नेछन्। त्यसपछि नजिकको जिल्ला निर्वाचन कार्यालय वा नामावली संकलन केन्द्रमा गएर जैविक विवरण—फोटो र औंठाछाप—दिएको आधारमा दर्ता प्रक्रिया पूरा गर्न सकिने छ।
२ लाख ५० हजारभन्दा बढी नयाँ मतदाता दर्ता
नामावली संकलन अभियान सुरु भएपछि (कात्तिक २७ गतेसम्म) कुल २ लाख ५७ हजार ५०५ नयाँ मतदाताले नाम दर्ता गराइसकेको आयोगले जनाएको छ। म्याद थपिएसँगै यो संख्या अझै बढ्ने आयोगको अनुमान छ।
निर्वाचन तयारीका लागि महत्वपूर्ण चरण
आगामी दिनमा हुनसक्ने निर्वाचनका तयारीका लागि मतदाता नामावली अद्यावधिक अत्यन्त महत्वपूर्ण चरण मानिन्छ। आयोगले योग्य नागरिकलाई अनिवार्य रूपमा नाम दर्ता गराउन पनि आग्रह गरेको छ।
प्रकाशित मिति: शुक्रबार, कात्तिक २९, २०८२
