काठमाडौं । नेकपा (एमाले) का उपाध्यक्ष सुरेन्द्र पाण्डेले भदौ २३ गतेको गोलीकाण्डप्रति गम्भीर प्रतिक्रिया जनाउँदै सरकार जिम्मेवारीबाट पन्छिन नसक्ने बताएका छन् ।
चितवनमा बुधबार सञ्चारकर्मीहरूसँग कुरा गर्दै उनले भने, ‘धरहरा बनाएको सरकार भनेर श्रेय लिने, तर आन्दोलनमा १९ जनाको ज्यान जाने गरी चलेको गोली कसले चलायो भन्ने थाहा छैन भन्न मिल्दैन । त्यो गलत हो । जसले गरे पनि, एमाले सरकारले गरे पनि दोषी त सरकार नै हुन्छ ।’
उपाध्यक्ष पाण्डेले पहिलो दिनमै यति ठूलो मानवीय क्षति हुनु अत्यन्त दुःखद् र अस्वीकार्य रहेको बताए । उनले बंगलादेश लगायतका देशहरूमा भएका आन्दोलनहरूमा पहिलो दिन यति ठूलो क्षति नभएको उदाहरण दिँदै तत्कालीन सरकारले किन नियन्त्रण गर्न सकेन भन्नेबारे छानबिन हुनुपर्नेमा जोड दिए ।
‘दोषी जो–कोही हुन्, प्रमाणका आधारमा कानुनी कारबाही हुनैपर्छ,’ उनले स्पष्ट पारे ।
भदौ २४ गते भएका तोडफोड, आगजनी र लुटपाटप्रति पनि पाण्डेले ती कार्यहरू समान रूपमा अक्षम्य रहेको टिप्पणी गरे । ‘सिंहदरबार जलाउने, अदालत वा निजी सम्पत्ति नष्ट गर्ने कुरा स्वीकार्य छैन,’ उनले भने, ‘यदि कानुनी शासन नै रहँदैन भने देश कसरी चल्छ?’
उनले भदौ २३ र २४ का घटनाहरू आपसमा सम्बन्धित रहेको बताउँदै भने, ‘२३ गतेको घटना नभएको भए २४ गतेको स्थिति पनि उत्पन्न हुने थिएन ।’
पाण्डेले अपराधमा संलग्न जो–कोही भए पनि— चाहे एमालेकै कार्यकर्ता किन नहोस्—उनीहरूलाई कानुनी रूपमा कारबाही गर्नुपर्नेमा जोड दिए । ‘संलग्न छन् भने एमालेमाथि पनि कारबाही होस्, हामी त्यसमा समर्थन गर्छौं,’ उनले भने ।
प्रकाशित मिति: बुधबार, कात्तिक २७, २०८२
