ललितपुर । उपत्यकाका चार नारायणमध्ये एक, ऐतिहासिक विशंखुनारायण मन्दिरको मुख्य प्रवेशद्वारमै विश्व विनायक गणेश मन्दिर निर्माण गरिएको छ।
गोदावरी नगरपालिका–२ स्थित यो नयाँ गणेश मन्दिरमा मंगलबार विशेष पूजा–आराधना गर्दै मूर्तिको प्राण–प्रतिष्ठा सम्पन्न गरिएको हो। ‘विश्व विनायक’ नाम दिइएको यस मन्दिरको निर्माणले नारायण मन्दिर परिसरलाई थप पूर्णता र आकर्षण दिएको छ।
गणेश मन्दिर निर्माणपछि अब विशंखुनारायण मन्दिर आउनेमध्ये भक्तजनले सुरुमा गणेश पूजा गरेर मात्र नारायण मन्दिर प्रवेश गर्ने व्यवस्था मिलाइएको छ। मन्दिर व्यवस्थापन समितिका अनुसार करिब ४ लाख रुपैयाँको लागतमा स्थानीय चन्दा सहयोगमार्फत यो मन्दिर निर्माण गरिएको हो।
गणेश मूर्तिको दान स्थानीय समाजसेवी बेदबहादुर खड्काले गरेका हुन्। करिब ७५ हजार रुपैयाँमा निर्मित यो मूर्ति प्राण–प्रतिष्ठासहित मन्दिरमा स्थापना गरिएको हो। मन्दिर निर्माण अभियानको नेतृत्व मन्दिर व्यवस्थापन समितिका अध्यक्ष श्याम विष्टले गरेका थिए। विष्टको कार्यकालमा विशंखुनारायण परिसरको सौन्दर्य र संरचना पुनःजीवन पाएको स्थानीयहरूको भनाइ छ।
धार्मिक मान्यताअनुसार उपत्यकाका चार नारायणमध्ये जेठो नारायण चाँगुनारायण, माहिलो विशंखुनारायण, साहिलो शेषनारायण, र कान्छो इचंगुनारायण मानिन्छन्। ऐतिहासिक र पौराणिक महत्व बोकेको विशंखुनारायण परिसरमा गणेश मन्दिरको समावेशसँगै धार्मिक र सांस्कृतिक वातावरण झन् समृद्ध भएको छ।
प्रकाशित मिति: मंगलबार, असार ३१, २०८२
-1752594743.JPG)
