चितवन । चितवनमा रहेका २ ठूला नदीमा बुधबार ५ वटा शव फेला परेको छ।
जिल्ला प्रहरी कार्यालयले दिएको जानकारीअनुसार नारायणीमा ४ र राप्ती नदीमा १ जनाको शव फेला परेको हो।
कार्यालयका प्रवक्ता प्रहरी नायब उपरीक्षक सूर्यबहादुर थापाका अनुसार वर्षा रोकिएर नदीको बहाव घटेसँगै बग्दै गरेका र किनारमा तैरिएको अवस्थामा ५ शव भेटिएका हुन् ।
भरतपुर महानगरपालिका-१ ठिमुरामा २ जनाको बेवारिसे शव फेला परेको छ । तीमध्ये १ जना अन्दाजी १५ वर्षीया किशोरी र अर्का ५५ वर्षीय १ पुरुष रहेको थापाले जानकारी दिए । ती शव सडेको अवस्थामा फेला परेका हुन् ।
त्यस्तै भरतपुर महानगरपालिका–१६ बस्ने वर्ष ४० का सानो कान्छा भन्ने कर्णबहादुर सुनारको शव बुधबार फेला परेको छ । मंगलबारदेखि उनी बेपत्ता भएका थिए। वडा नम्बर १६ कै झनझने भन्ने ठाउँमा उनको शव भेटिएको हो।
भरतपुरकै वडा नम्बर १ गैँडाचोकस्थित नारायणी किनारमा अन्दाजी ५० वर्षीया एक महिलाको शव फेला परेको छ ।
त्यस्तै पूर्वीचितवनको खैरहनी नगरपालिको बूढी राप्ती खोलामा बगाएर ल्याएको अन्दाजी ५० वर्षीय पुरुषको शव भेटिएको प्रहरीले जनाएको छ।
बग्दै गरेको शव देखिएपछि स्थानीय र प्रहरीले नदी बाहिर निकालेका थिए। १ जनाबाहेक अन्यको सनाखत हुन सकेको छैन।
विभिन्न ठाउँमा बगाएको वा पुरेको ठाउँबाट बाढीले निकालेर शव बाहिर ल्याएको हुनसक्ने अनुमान गरिएको छ। शवको मुचुल्का गरेर परीक्षणका लागि भरतपुर अस्पताल राखिएको छ।
प्रकाशित मिति: बिहीबार, साउन ८, २०७७
-1732776560.jpg)
