लहान । सिरहाको लहान–ठाडी सडकअन्तर्गत लहान नगरपालिका–२३ स्थित सडकमा २ वटा मोटरसाइकल आपसमा ठोक्किँदा १ जनाको मृत्यु भएको छ भने २ जना घाइते भएका छन् ।
उत्तरबाट दक्षिणतर्फ आउँदै गरेको स ३ प ५३१९ र विपरीत दिशाबाट जाँदै गरेको स ६ प २६७६ नम्बरको मोटरसाइकल आपसमा ठोक्किँदा स ३ प ५३१९ नम्बरको मोटरसाइकलका चालक लहान नगरपालिका–५ निवासी ४० वर्षीय सबिर अहमद नवाफको मृत्यु भएको प्रहरीले जनाएको छ ।
दुर्घटनामा परी गम्भीर घाइते नवाफलाई उपचारका लागि लहान अस्पताल ल्याउँदै गर्दा बाटोमै मृत्यु भएको जिल्ला ट्राफिक प्रहरी कार्यालयले जनाएको छ ।
मृतकको शव लहानस्थित रामकुमार उमाप्रसाद स्मारक अस्पतालमा राखिएको छ । सोही दुर्घटनामा परी लहान नगरपालिका–२४ गोविन्दपुर निवासी २१ वर्षीय राहुल भण्डारी र स ६ प २६७६ नम्बरको मोटरसाइकल चालक लहान–२३ बथनाहा निवासी १८ वर्षीय रामशंकर यादव घाइते भएका छन् ।
घाइते दुवैलाई थप उपचारका लागि विराटनगर पठाइएको जिल्ला ट्राफिक प्रहरी कार्यालयले जनाएको छ ।
प्रकाशित मिति: आइतबार, मंसिर २९, २०७६
-1732776560.jpg)
