इटहरी । १ नम्बर प्रदेशका सामाजिक विकासमन्त्री जीवन घिमिरेले सामाजिक सञ्जालका कारण लैंगिक हिंसाका घटना बढेको बताएका छन् ।
लैंगिक हिंसा विरुद्धको इटहरी सम्मेलनलाई सम्बोधन गर्दै उनले मादक पदार्थ हिंसाको अर्को कारण भएकाे बताए । देशमै प्रदेश नम्बर १ मा सबैभन्दा बढी मदिरा सेवन गर्ने गरेको तथ्यांक रहेको बताए ।
मन्त्री घिमिरेले हिंसाविरुद्धको अभियानलाई गाउँ बस्तीसम्म पु¥याएकामा इटहरी उपमहानगरको प्रशंसा गरे । लैंगिक हिंसा विरुद्धको अभियानमा पुरुष सहभागिता बढाउनुपर्नेमा उनले जोड दिए ।
कार्यक्रममा बोल्दै रेवतीरमण भण्डारीले महिला हिंसाविरुद्ध अन्य देशमा नभएका प्रावधान समेत नेपालको संविधानमा रहेको बताए । कानुनी दायरा फराकिलो वनाइएका कारण घटना सार्वजनिक हुने क्रम पनि बढेको उनले बताए ।
प्रदेश सांसद लीलम बस्नेतले इटहरी लैगिंक हिंसामुक्त क्षेत्र बन्ने गरी परिणाममुखी कार्यक्रम सञ्चालन गरिनुपर्नेमा जोड दिए । इटहरी उपमहानगरका मेयर द्वारिकलाल चौधरीले लैंगिक हिंसा न्यूनीकरणका लागि उपमहानगरले कुनै कसर बाँकी नराख्ने प्रतिबद्धता जनाए ।
कार्यक्रममा इटहरी उपमहानगरकी उपप्रमुख लक्ष्मी गौतमले इटहरीमा लैंगिक हिंसाको अवस्थाका बारेमा प्रतिवेदन प्रस्तुत गरिन् । सबै वडाका १९ सय २२ जनासँग सर्वेक्षण गरेर न्यायिक समिति, प्रहरी र अन्य स्रोतलाई आधार मानेर प्रतिवेदन तयार गरिएको उपप्रमुख गौतमले बताइन् ।
लैंगिक हिंसा विरुद्धको इटहरी सम्मेलनमा इटहरीका सबै वडाका गरी ३ सय जनाभन्दा बढी स्थानीय सहभागी छन् । सहभागीहरुलाई ७ वटा समूह बनाएर छलफल गरी एक बर्से कार्ययोजना तयार गरिने छ ।
प्रकाशित मिति: मंगलबार, मंसिर २४, २०७६
-1732776560.jpg)
