इटहरी : नेपाल सङ्गीत तथा नाट्य प्रज्ञाप्रतिष्ठान र सङ्गीत साधना प्रतिष्ठान नेपालद्वारा प्रदेश १ को इटहरीमा प्रदेश १ स्तरीय बहुभाषिक सङ्गीत उत्सव संपन्न भएको छ ।
उत्सवलाई सम्बोधन गर्दै प्रदेश १ का मुख्यमन्त्री शेरधन राईले यो उत्सवले मातृभाषा, सङ्गीत र संस्कृतिको उत्थान, संरक्षण र प्रवर्द्धनमा महत्त्वपूर्ण भूमिका खेल्ने बताए । उनले भाषा नेपाली जातिको मौलिक पहिचान भएको विचार व्यक्त गर्दै आफ्नो भाषा, संस्कार र संस्कतिलाई बचाउन सकिएन भने मानिस हुनुको सार्थकता नरहने उल्लेख गरे । मुख्यमन्त्रीले देश समृद्धिको यात्रामा अगाडि बढेको तर साहित्य, कला र संस्कृतिको समृद्धिबिना त्यो समृद्धि अधुरो रहने धारणा राखे । उनले भने, यसै कुरालाई मनन् गरी प्रदेश सरकारले बृहत् साहित्य, कला र संस्कृति सम्मेलन आयोजना गर्नुका साथै एउटा महासांस्कृतिक सङ्ग्रहालय निर्माण गर्ने योजना बनाएको छ ।
सङ्गीत तथा नाट्य प्रज्ञाप्रतिष्ठानका सदस्य सचिव श्याम तमोटले प्रतिष्ठानका योजना, कार्यक्रम र गतिविधिमाथि प्रकाश पार्दै नेपाली जाति विविध संस्कृतिले सम्पन्न भए तापनि आर्थिक कारणले पछि पर्नुपरेको उल्लेख गर्दै आफ्ना मौलिक कला, सङ्गीत र संस्कृतिको संरक्षणमा सचेत हुनुपर्ने बताए ।
सङ्गीत विभाग प्रमुख एवम् उत्सव संयोजक अशोक राईले राष्ट्रभित्रका सबै सङ्गीत राष्ट्रिय सङ्गीत भएकाले तिनको संरक्षण र प्रवर्द्धन गर्ने उद्देश्यले बहुभाषिक सङ्गीत उत्सवको आयोजना गरिएको जानकारी गराए ।
शुक्रबार सुरु भई शनिबार सम्पन्न उत्सवको पहिलो दिन आयोजित बहुभाषिक सङ्गीतसम्बन्धी विचार गोष्ठीमा संस्कृतिविद् डा. भक्त राईले कार्यपत्र प्रस्तुत गर्नुभएको थियो । डा. राईले मौलिक सङ्गीतले मात्रै नेपाली सङ्गीतलाई अन्तर्राष्ट्रिय जगतमा चिनाउन सकिने दाबी गर्नुभयो । उनले भने, बहुभाषिक सङ्गीतलाई आयआर्जनसँग जोड्न सकियो भने मात्रै बहुभाषिक सङ्गीतसँगसँगै राष्ट्र पनि समृद्ध बन्ने छ ।
कार्यक्रममा नेपाल प्रज्ञाप्रतिष्ठानका प्राज्ञ सभा सदस्य शशि लुमुम्बू, सङ्गीत नाट्यकी प्राज्ञ सभा सदस्य एवम् गायिका सत्यकला राई, सांस्कृतिक संस्थानका सदस्य प्रेमनाथ अधिकारी, सङ्गीत साधनाका अध्यक्ष राम धामी, महासचिव राजु केसी, सङ्गीतकार सङ्घ नेपालका महासचिव पारस मुकारुङलगायतले कार्यक्रममा बहुभाषिक सङ्गीतको महत्त्वमाथि प्रकाश पारेका थिए ।
उत्सवमा प्रदेश ३ बाट शेर्पा र प्रदेश १ का विभिन्न जिल्लाबाट बान्तवा, उराव, मुस्लिम, आठपहरिया राई, थारू, मगर, लिम्बू, चाम्लिङ, दुमी, राजवंशी, धिमाल, लिम्बू, शेर्पा, बान्तवा, सुनुवारलगायतका १९ भाषाका गीत, सङ्गीत प्रस्तुत गरिएका थिए ।
प्रकाशित मिति: आइतबार, वैशाख २९, २०७६ १९:२३
