काठमाडौं : काठमाडौंमा चीनको हुनानका सांस्कृतिक पोष्टरहरूको बृहत् प्रदर्शनी सुरु गरिएको छ । बबरमहलस्थित नेपाल कला परिषद्मा शनिबार आयोजित एक भव्य कार्यक्रमका बीच सो प्रदर्शनीको शुभारम्भ भएको हो ।
नेपाल कम्युनिष्ट पार्टीका नेता तथा सांसद महेश बस्नेत, नेपालका लागि चिनियाँ राजदूत होउ यान्छी र हुनान प्रान्तको संस्कृति तथा पर्यटन विभागका उपनिर्देशक यान फु छुले संयुक्त रूपमा सो प्रदर्शनीको उद्घाटन गरे । अतिथिहरूले प्रदर्शनीमा राखिएका पोष्टरहरू निकै चाख मानेर अवलोकन गरेका थिए ।
कार्यक्रममा हुनान प्रान्तको संस्कृति तथा पर्यटन विभागका उपनिर्देशक याङ फु छुले हुनानको कला नेपालमा प्रदर्शन गर्न पाउँदा खुसी लागेको बताए । हुनान प्रान्त सांस्कृतिक विविधताले भरिएकाले त्यहाँको संस्कृति र कलामार्फत् प्रदर्शन गर्ने जमर्को गरिएको बताए । प्रदर्शनीबाट हुनानको इतिहास, संस्कृति बुझ्न सहयोग पुग्ने उनले बताए । उनले हुनान अत्यन्तै सुन्दर भएकाले नेपालीहरूलाई घुम्न आउन निम्ता पनि दिए ।
कार्यक्रमलाई सम्बोधन गर्दै नेपालका लागि चिनियाँ राजदूत यान्छीले आफू पनि हुनान पुग्न र हेर्न नपाएकाले प्रदर्शनीबाट धेरै कुरा जान्न पाएको बताइन् । सांस्कृतिक रूपमा सबल रहेको हुनान चिनियाँ नेता माओको जन्मस्थान पनि भएको बताउँदै राजदूत होउले एक पटक घुम्नुपर्ने ठाउँ भएको बताइन् ।
केही वर्षयता बेल्ट एण्ड रोड क्षेत्रको व्यावहारिक सहकार्यमार्फत् मजबुत बनाएको दुई मुलुकको सम्बन्धलाई हुनान क्षेत्रको सांस्कृतिक पोष्टरहरूले पनि जोडेको उल्लेख गरिन् । उनले भनिन्, ‘आजको पोष्टर प्रदर्शनी एक महत्त्वपूर्ण कदम हो । यसले दुई मुलुकको सांस्कृतिक आदान प्रदानलाई बढावा दिनेछ ।’
कार्यक्रमलाई सम्बोधन गर्दै नेकपाका नेता तथा सांसद महेश बस्नेतले हुनानको सांस्कृतिक पक्षलाई नेपाल सामु पस्केको बताए । उनले भने, ‘प्रदर्शनीमा राखिएका तस्वीरहरूले हुनान संस्कृतिका विशेषताहरू झल्काएको छ, त्यहाँको आदर्श जीवनशैली, स्वभाव सादगी, इमान्दारी र आत्मविश्वास तथा यस क्षेत्रको सफलता र विकासलाई समावेश गरेको छ ।’ तस्वीर अवलोकन गरेर आगन्तुकहरूले हुनान प्रान्तको आर्थिक तथा भौतिक पूर्वाधारको क्षेत्रमा भएको प्रगति एवम् उन्नति जान्ने मौका प्राप्त भएको उनले बताए ।
प्रदर्शनीमा चीनका कलाकारहरूसहित नेपालका कलाकार, विद्यार्थी, मैत्री संस्थाका प्रतिनिधि, सम्बन्धित क्षेत्रका विज्ञ तथा आमन्त्रितसहित करिब २५० जनाको उपस्थिति थियो । प्रदर्शनीमा नेपालस्थित चिनियाँ सांस्कृतिक केन्द्र तथा हुनान प्रान्तीय संस्कृति र पर्यटन विभाग, हुनान विश्वविद्यालयको ललितकला संकाय र हुनान रेड नेटको आयोजना तथा नयाँ मिडिया कम्पनीको सहआयोजना रहेको छ ।
प्रदर्शनीमा ६० वटा पोष्टरहरू राखिएका छन् । शनिबार उद्घाटन गरिएको प्रदर्शनी आइतबार पनि कला परिषद्मा जारी रहनेछ भने सोमबार बिहान ९ बजेदेखि ५ बजेसम्म चिनियाँ सांस्कृतिक केन्द्रमा प्रदर्शनी गरिने आयोजकले जनाएको छ ।
प्रकाशित मिति: आइतबार, वैशाख १, २०७६ १५:५२
