ढाका ः बंगलादेशको राजधानी ढाकामा बुधबार राती भएको आगलागीमा परी कम्तीमा ७८ जनाको ज्यान गएको छ ।
राजधानी ढाकाको बजार क्षेत्रमा सो आगलागी भएको थियो । राती भएको सो भीषण आगलागीमा परी ७८ जनाको ज्यान गएको छ भने अरू दर्जनौँ व्यक्ति जलेर घाइते भएका छन् ।
जलेर मृत्यु हुनेमा अधिकांश महिला र बालबालिका छन् । उनीहरूलाई अस्पताल पुर्याइएको र तीमध्ये धेरैको अवस्था गम्भीर रहेको ढाका प्रहरीले जानकारी दिएको छ ।
ढाकाको चवाक बजारमा रहेको एक घरमा ग्याँसको सिलिन्डर विस्फोट भएको थियो । उक्त विस्फोटबाट निस्किएको आगोले सबैभन्दा पहिला ५ तले भवन जलेको थियो ।
राजधानी ढाकाको पुरानो बस्तीतिरको क्षेत्र भएकाले घरहरू जोडिएर रहेका कारण एकपछि अर्काे घरमा आगो फैलिएको थियो ।
यसरी फैलिएको आगोका कारण यहाँका धेरै घर जलेर नष्ट हुनुका साथै धेरै घरमा आगो सल्किएको र जनधनको ठूलो क्षति हुन पुगेको प्रहरीले जानकारी दिएको छ ।
ढाकाको आगलागी नियन्त्रण विभागका एक जना अधिकारी महफुज रिवनले सो जानकारी दिएका हुन् । उनका अनुसार एक घरमा सिलिन्डर पड्किएर भएको आगलागीले सो घरसँगै रहेको अर्काे घरलाई पनि छोएको र उक्त घरमा रसायनिक पदार्थहरू राख्ने गरिएको एक गोदाम रहेकाले आगो झन् बढेको थियो ।
उनका अनुसार बुधबार राती करिब १० बजेतिर उक्त आगलागी सुरु भएको थियो । आगो नियन्त्रणमा गर्न धेरै समय लागेकाले ठूलो जनधनको क्षति हुन पुगेको थियो ।
उनले आगो नियन्त्रणका लागि कम्तीमा पनि ३७ वटा दमकलको प्रयोग गरिएको जानकारी दिएका छन् । आगोको मुस्लो बढ्दै जाँदा अर्काे घरमा सल्किन पुगेको थियो ।
सो आगलागी नियन्त्रणका लागि ३७ वटा अग्नि नियन्त्रक र ठूलो संख्यामा कर्मचारी खटिए पनि बिहीबार बिहान ३ बजे मात्र आगो नियन्त्रणमा आएको उनले बताए ।
अग्नि नियन्त्रकहरूले अहिले पनि विभिन्न घर र तिनका भग्नावशेषमा लागेको आगो निभाउने प्रयास जारी राखेकाे बताइएको छ ।
ढाका प्रहरीका अनुसार उद्धार कार्य जारी रहेकाले कति जनाको ज्यान गएको हो भन्नेबारे यकिन हुन बाँकी रहेकाे छ ।
हाल ६९ जनाको शव भेटिएको तर जलेर अस्पतालमा उपचार गराइरहेका नागरिकको संख्या धेरै रहेकाले मृतकको संख्या बढ्न सक्ने बताइएको छ ।
