सिड्नी । संस्कृति, पर्यटन तथा नागरिक उड्यनमन्त्री योगेश भट्टराईले अस्ट्रेलियाबासी र यहाँ रहेका नेपालीलाई नेपाल भ्रमणका लागि निमन्त्रणा गरेका छन् ।
भ्रमण वर्ष सन् २०२० को अन्तर्राष्ट्रिय रुपमा मंगलबार यहाँ औपचारिक शुभारम्भ गर्दै उनले जीवनको नयाँ अनुभवका लागि नेपालको भ्रमण गर्न सबैमा अनुरोध गरेका हुन् ।
प्राकृतिक हिसाबले विश्वकै धनी देश नेपालमा भ्रमण गर्न आग्रह गर्दै उनले भने, लाइफ टाइम एक्सपेरिएन्सका लागि भ्रमणको निम्तो दिन चाहन्छु । नेपालमा विशेष तयारीका साथ यस वर्षलाई भ्रमण वर्षका रुपमा मनाउन लागिएको जानकारी दिँदै उनले नेपालको पर्यटकीय महत्वका बारेमा जानकारी दिएका थिए ।
काठमाडौँ र अस्ट्रेलियाबीच सिधा उडानका लागि सम्झौतापछि कार्यान्वयनका लागि पहल भइरहेको भन्दै उनले दुई देशका बीचमा लामो समयदेखि कूटनीतिक सम्बन्ध रहेको बताए। आफ्नो मन्तव्यको शुभारम्भमा नै मन्त्री भट्टराईले डढेलोका कारण अस्ट्रेलियावासी जनतामा परेको समस्याप्रति दुःख व्यक्त गर्दै उनले मृतकहरुप्रति समवेदना प्रकट गरे।
छिट्टै डढेलो नियन्त्रणमा आएर यहाँको जनजीवन सहज हुने पनि उनले विश्वास व्यक्त गरे। सो अवसरमा न्यू साउथ वेयल्स राज्य संसद्का सभामुख जोनाथन वडीले नेपाल सुन्दर रहेको भन्दै भ्रमणका लागि धेरैभन्दा धेरै अस्ट्रेलियावासी जाने विश्वास व्यक्त गरे।
कार्यक्रममा अष्ट्रेलियका लागि नेपाली राजदूत महेशराज दाहालले भ्रमण वर्षलाई सफल बनाउन यहाँ रहेका सम्पूर्ण नेपालीहरुमा आनुरोध गरे। आफू र आफ्ना यहाँका नेपाली एवं अष्ट्रेलियन साथीहरुलाई भ्रमणका लागि नेपाल लैजान उनको आग्रह थियो ।
सो अवसरमा अस्ट्रेलियाका पक्ष र प्रतिपक्ष दल एवं काउन्सिलका प्रतिनिधिसहितको उपस्थिति थियो। कार्यक्रम सुरु हुनुअघि सिड्नीको सर्कुलर क्येवमा मौन जुलुसमार्फत पर्यटन वर्षको प्रवर्द्धन पनि गरिएको थियो ।
अहिले सिड्नीमा नै यहाँका राजनीतिक दल, कूटनीतिज्ञ, पर्यटन व्यवसायी, व्यवसायी, गैरआवासीय नेपाली महासंघका विभिन्न तह र तप्कामा रहेका व्यक्तिको उपस्थितिमा भ्रमण वर्षका सम्बन्धमा छलफल एवं रात्रिभोज सुरु भएको छ ।
गत वर्ष अस्ट्रेलियाबाट ३३ हजार पर्यटकले नेपाल भ्रमण गरेको तथ्यांक छ। यो सङ्ख्यालाई दोब्बरभन्दा बढी बनाउन राजदूतावास लागि परेको छ। गैर आवासीय नेपाली महासङ्घ र न्यू साउथ वेयल्सको महावाणिज्य दूतावासको सहयोगमा अस्ट्रेलियाका लागि नेपाली राजदूतावासले कार्यक्रमको आयोजना गरेको हो।
यसैबीच, पर्यटनमन्त्री भट्टराईले अस्ट्रेलियामा कार्यक्रम गर्न राेकिएकाे भनेर आएकाे समाचारप्रति खेद व्यक्त गरेका छन् । सिड्नीमा नेपाल भ्रमण वर्ष २०२० को कार्यक्रम उद्घाटन गर्न पुगेका पर्यटनमन्त्री योगेश भट्टराईको र्यालीलाई त्यहाँको प्रहरीले रोकेको समाचार प्रकाशित भएकाे थियाे ।
सामाजिक सञ्जालमा लेख्दै उनले समाचारप्रति गम्भीर ध्यानाकर्षण भएकाे बताएका छन् ।
प्रकाशित मिति: मंगलबार, पुस २२, २०७६ १२:११
