काठमाडौँ । नेकपा (माओवादी केन्द्र) का सांसद देवेन्द्र पौडेलले सदन भवनलाई कटाक्ष भूमि नभई रचनात्मक बहसको केन्द्र बनाउनुपर्नेमा जोड दिएका छन् ।
मङ्गलवारको प्रतिनिधि सभा बैठकमा बोल्दै उनले संसद् भुइँमान्छेको दैनिकी बदल्ने कोणबाट बहस हुनुपर्नेमा जोड दिए । उनले भने, ‘व्यवस्था फेरियो अवस्था फेर्ने चरणमा छौँ । चिच्याउने मात्र होइन, आँगन र भुइँमान्छेहरुको आँगन र चुलोमा लोकतन्त्र पुर्याउने हो । भुइँमान्छेको हालत कस्तो छ भन्ने कुरा बिदेसिएकाहरूबाट हेर्न सकिन्छ । उनीहरूलाई नेपाल फर्काउने वातावरण बनाउनुपर्छ ।’
साथै उनले अदालतले पार्टी विभाजन गरेको सरकार ढालेका जस्ता विषयहरूमा बहस गर्न जरुरी नरहेको सङ्केत गरे । बाहिर बसेर आलोचना गर्नेहरू र चर्का कुरा गर्नेहरू पनि यही संसद्मा रहेको भन्दै बहसबाट अवस्था परिवर्तन गर्ने गरी नीति निर्माण बनाउन ध्यान दिनुपर्ने जिकिर गरे ।
‘हिजो अदालतले गरेको कुराहरूमा कटाक्ष गरेर सदन बितायो भने विदेशमा भएका युवाहरूले के हेर्ने ? अर्थतन्त्र बिग्रियो भनेर नभनौँ तर सप्रेको पनि छैन । सर्पाने हामीले हो । त्यसमा छलफल गरौँ । तीन विषयमा राष्ट्रिय सहमति खोजौँ,’ उनले भने ।
प्रकाशित मिति: मंगलबार, माघ १०, २०७९ १५:०६
