काठमाडौँ । चीनले नेपालसहित एसिया प्रशान्त क्षेत्रका मुलुकका परराष्ट्र र अर्थमन्त्रीहरूसँग बेल्ट एन्ड रोड इनिसिएटिभ (बीआरआई) मा केन्द्रीत रही उच्चस्तरीय सम्मेलनको आयोजना गरेको छ । बीआरआई र कोरोना महामारीबारे ३० देशका प्रतिनिधिहरुलाई भेला गरी छलफलको आयोजना गरेको हो ।
छलफलमा नेपालका तर्फबाट उपप्रधानमन्त्री तथा अर्थमन्त्री विष्णु पौडेको सहभागिता रहेको थियो । सम्मेलनमा बोल्दै पौडेलले कोरोना महामारीलाई नियन्त्रण गर्नका लागि विश्वव्यापी सहकार्य, एकता र ऐक्यबद्धता आवश्यक रहेको बताए ।
कार्यक्रमको अध्यक्षता चिनियाँ विदेशमन्त्री वाङ यीले गरेका थिए । सम्मेलनमा चिनियाँ राष्ट्रपति सि जिनपिङले एक लिखित सन्देश पठाएका थिए ।
राष्ट्रपति सिले चीनले अन्य मुलुकहरूसँग बीआरआई मार्फत नजिकको सहकार्य गर्न चाहेको उल्लेख गर्दै मुलुकहरूको बीचको सहकार्य र विकासलाई नयाँ गति दिनुपर्ने र चीनले अगाडि सारेको सिल्क रोडलाई अगाडि बढाउनुपर्नेमा जोड दिएका थिए ।
‘गत ८ वर्षमा १४० मुलुकले बीआरआई सहकार्य गर्ने प्रतिविद्धतासहित हस्ताक्षर गरेका छन् र बढीभन्दा बढी सहकार्य गर्न इच्छुक साझेदार आएका छन्’ सिले भने ।
यस्तै चिनियाँ राष्ट्रपतिले वृहत् परामर्श, संयुक्त योगदान, साझा फाइदा, खुलापन, हरित विकास र दीर्घकालीन विकास बिआरआईका मुख्य सिद्धान्त रहेको बताए । उनले चीन विकासको नयाँ चरणमा पुगेको उल्लेख गर्दै उनले विकासको नयाँ अवधारणालाई अगाडि बढाएको र यसले साझेदार मुलुकलाई बजार तथा लगानी वृद्धिमा थप अवसरहरू प्रदान गर्ने बताए ।
अहिले १४० मुलुक र क्षेत्र अनि ३२ अन्तर्राष्ट्रिय संस्थाहरूले बीआरआईमा सहकार्य गर्ने विषयमा हस्ताक्षर गरेका छन् । जी–७ को एक सदस्य इटलीले पनि बीआरआईमा सहकार्य गर्ने भनी चीनसँग सम्झौता गरेको छ ।
चीनले सन् २०१३ मा परियोजना सञ्चालन भएयता बीआरआईमार्फत अहिले विभिन्न मुलुक र क्षेत्रमा १३६ बिलियन अमेरिकी डलर लगानी सुरु गरिसकेको छ।
विश्वका धनी मुलुकहरूको क्लब जी–७ ले बीआरआईलाई काउन्टर गर्न बी–३ डब्ल्यु परियोजना अगाडि सारे लगत्तै चीनले यस्तो सम्मेलनको आयोजना गरेको हो । जी–७ मुलुकले बीआरआईलाई काउन्टर गर्न भन्दै बी–३ डब्ल्यु परियोजना अगाडि सारेपछि चिनियाँ विज्ञ र सञ्चारमाध्यममा यस सम्बन्धमा बहस भइरहेको छ ।
प्रकाशित मिति: बिहीबार, असार १०, २०७८ १२:५१
