काठमाडौं। नेपाली कांग्रेसका सभापति शेरबहादुर देउवाले सरकारविरुद्ध दशैँपछि व्यापक आन्दोलन र संसद्मा हङ्गामा गर्ने बताएका छन्।
सरकारले कोरोना नियन्त्रण गर्न नसकेको जनाउँदै देउवाले देशव्यापी आन्दोलन र संसद्मा हङ्गामा मच्चाउने बताएका हुन् । पार्टीले गठन गरेको कोरोना संक्रमण अनुगमन समितिले तयार गरेको प्रतिवेदन बुझ्ने क्रममा देउवाले भने, ‘दशैँपछि देशव्यापी आन्दोलन गर्छौ। संसद् बोलाउन लगाएरै छोड्ने छौँ। जनताको जीवन रक्षा व्यवस्था गर्न सरकारलाई वाध्य पार्छौ।’
सरकारलाई गलाउन संसद्मा हङ्गामा गर्ने उनले बताए। सडक आन्दोलनका लागि कार्यकर्तालाई तयार रहन पनि उनले निर्देशन दिए। सरकारले नागरिक ‘मरे मरुन’ को व्यवहार देखाएको उनले आरोप लगाए।
जनताको स्वास्थ्य महत्वपूर्ण भएपनि सरकार त्यसलाई महत्व नदिएर भ्रष्टाचारमा लागेको बताए। अक्सिजनको व्यवस्था, आइसोलेसन र क्वारेन्टाइन बनाउने सरकारको दायित्व भएपनि सरकारले ध्यान नपुर्याएको उनले बताए।
प्रकाशित मिति: शुक्रबार, असोज ३०, २०७७ १८:०५
