नेकपा अध्यक्ष प्रचण्ड र संसदीय दलका उपनेता नेम्वाङबीच भेटवार्ता

राजनीति

आजको न्युज बिहिबार, साउन २२, २०७७, १३:२६:००

काठमाडौं । सत्तारुढ नेपाल कम्युनिस्ट पार्टी (नेकपा) का अध्यक्ष पुष्पकमल दाहाल प्रचण्ड र संसदीय दलका उपनेता सुवास नेम्वाङबीच बिहीबार भेटवार्ता भएको छ ।

प्रधानमन्त्री एवं अर्का अध्यक्ष केपी ओलीको सन्देश लिएर नेता नेम्वाङ प्रचण्ड निवास पुगेका थिए । २ अध्यक्षबीचको वार्ता हुन नसकिरहेका बेला प्रचण्डकै आग्रहमा नेम्वाङ खुमलटार पुगेका हुन् ।

भेटका क्रममा अध्यक्ष प्रचण्डले नेता नेम्वाङले पार्टीको विवाद मिलाउन सक्ने उल्लेख गर्दै त्यसका लागि लाग्न आग्रह गरेका थिए ।

प्रचण्डका प्रेस संयोजक विष्णु सापकोटा जुगलले समसामयिक विषयमा छलफल भएको जानकारी दिए ।

नेता नेम्वाङले प्रचण्डले बोलाएर आफू गएको उल्लेख गर्दै पार्टीमा सहमति हुनेमा आशावादी भएको बताए ।

स्रोतका अनुसार नेम्वाङले २ अध्यक्षबीच वार्ता चलिरहेका बेला त्यसरी पत्रकार सम्मेलन गरेर असन्तुष्टि सार्वजनिक गर्दा राम्रो सन्देश नगएको बताएका थिए ।

बुधबार प्रचण्ड तथा वरिष्ठ नेता माधवकुमार नेपाल पक्षले ओलीप्रति आक्रोश व्यक्त गरेको थियो । उनीहरुले ओलीप्रति पार्टीलाई एकलौटी ढंगबाट चलाएको र विधिसम्मत हिसाबले नचलेको आरोप लगाएका थिए ।

प्रकाशित मिति: बिहिबार, साउन २२, २०७७, १३:२६:००

प्रतिक्रिया दिनुहोस्