काठमाडाैं । सत्तारुढ दल नेपाल कम्युनिस्ट पार्टी (नेकपा) का प्रवक्ता नारायणकाजी श्रेष्ठ प्रकाशले न्यायालयद्वारा गरिएकाे निर्णयले न्यायालय र सिंगै राज्य प्रणाली र व्यवस्थामाथि नै प्रश्न उठेकाे टिप्पणी गरेका छन् ।
सामाजिक सञ्जाल फेसबुकमा पाेस्ट गर्दै श्रेष्ठले न्याय सम्पादनमा जात, धर्म वा वर्ग विभेद स्पष्ट देखिँदै गएकाे भन्दै चिन्ता व्यक्त गरेका छन् ।
गाँस र बासकाे समस्याबाट गुज्रिरहेकाे गरिब चेपाङ समुदायकाे युवालाई सुरक्षा निकायबाट नै लखेटीलखेटी कुटेर मारेकाे र सुकुम्बासीकाे झुप्राेमा आगाे लगाउँदा पनि उनीहरूले न्याय नपाएकाे भन्दै उनले लेखेका छन्, 'के हुदैछ यस्तो ? न्यायालय र सिङ्गै राज्य प्रणाली र व्यवस्थामाथि नै प्रश्न उठ्ने गरी न्यायालयद्वारा निर्णय किन गरिँदै छ ? बास र छाक टार्ने समस्याबाट पीडित गरिब चेपाङ युवाको हत्या संवेदनशील सुरक्षा अङ्गबाट नै दर्दनाक ढङ्गले पिटीपिटी किन गरिन्छ र सुकुम्बासी झुप्रामा आगो किन लगाइन्छ ?'
कथित तल्लाे जातकै भएका कारण कसैकाे निर्ममतापूर्वक हत्या हुँदा पनि मूकदर्शक बस्ने तर पत्नी हत्यारालाई सजाय छुट गर्ने फेसलातर्फ संकेत गर्दै उनले अगाडि लेखेका छन्, 'कथित दलित भएकै आधारमा बर्बर सामूहिक हत्या किन गरिन्छ ? हद भयो ,असह्य भयो । न्याय स्थापित होस् र दोषी माथि कार्बाही होस् ।'
सडकमा आएकाे गलत न्याय सम्पादनविरुद्धकाे जनआवाजकाे सम्बाेधन गर्दै लाेकतन्त्रअनुरुपकाे राज्यका अंगकाे पुनःसंरचना गर्न आवश्यक रहेकाे श्रेष्ठले बताए ।
'यो अवाजलाई समयमै सम्बोधन गरौं र राज्यका अङ्गहरुको लोकतन्त्र अनुरुप पुनसंरचना गरी लोकतन्त्रलाई व्यवहारत: अभ्यास गरौं र विकास गरौं', उनले भनेका छन्, 'अन्यथा निराशा,आक्रोश, अनिश्चय र तरलताको परिणाम के होला ? समयमै सबैले सोचौं । परिणाम सधैं सकारात्मक नै हुन्छ भन्न सकिन्न ।'
प्रकाशित मिति: आइतबार, साउन ११, २०७७
