काठमाडाैं । श्रीमती हत्या आरोपमा जन्मकैदको सजाय भुक्तान गरिरहेका सशस्त्र प्रहरीका पूर्वडीआईजी रञ्जन कोइरालाकाे सजाय घटाएर कैदमुक्त गर्ने सर्वाेच्चकाे फैसलाविरुद्ध सरकारले दर्ता गरेको पुनरावलोकनको निवेदन आज पेसीमा चढेकाे छ।
न्यायाधीशहरू बमकुमार श्रेष्ठ, प्रकाशकुमार ढुंगाना र कुमार रेग्मीको इजलासले आइतबार उक्त मुद्दाको सुनुवाइ गर्ने सर्वोच्च अदालतले जनाएको छ ।
साे इजलासले सुनुवाइपछि फैसला पुनरावलोक गर्ने स्वीकृति दिने वा नदिनेबारे फैसला गर्ने छ ।
प्रधानन्यायाधीश चोलेन्द्र शमशेर जबरा र न्यायाधीश तेजबहादुर केसीको इजलासले रञ्जन कोइरालाले पाएको सर्वस्वसहितको जन्मकैदको फैसलालाई घटाएर ८ वर्ष ६ महिना कैद मात्रै तोकेको थियो ।
सर्वोच्चको फैसला त्रुटीपूर्ण रहेको भन्दै महान्यायाधिवक्ताको कार्यालयले सर्वोच्चमा पुनरावलोकन निवेदन दर्ता गरेको थियो ।
संवैधानिक व्यवस्थाअनुसार पुनरावलोकनमा गएकाले अन्तिम टुङ्गो नलाग्दासम्म यो मुद्दा विचाराधीन बनेको छ।
प्रकाशित मिति: आइतबार, साउन ११, २०७७ १०:५४