काठमाडौं । सर्वस्वसहित जन्मकैदको सजाय भोगिरहेका सशस्त्र प्रहरीका पूर्वप्रहरी नायब महानिरीक्षक (पूर्वडीआईजी) रञ्जन कोइरालालाई उन्मुक्ति दिँदै सजाय घटाएकाे फैसलाविरुद्धकाे पुनरावलाेकनमा आज सुनुवाइ हुने भएको छ ।
उनको आधाभन्दा बढी सजाय घटाउने गरी सर्वोच्च अदालतको फैसलामा महान्यायाधिवक्ताको कार्यालयले दर्ता गरेको पुनरावलोकनमा सुनुवाइका लागि आज पेसी तोकिएको छ ।
सशस्त्र प्रहरीका पूर्वडीआइजी कोइरालाले पत्नी गीता ढकालको हत्या गरेर प्रमाण लुकाउन शव जलाएको देखिएपछि काठमाडौं जिल्ला अदालत र ललितपुर पुनरावेदन अदालतले सर्वस्वसहित जन्मकैदको फैसला गरेको थियो ।
जिल्ला र पुनरावेदन अदालतले सर्वस्वसहित जन्मकैदको फैसला सुनाएका कोइरालालाई सर्वोच्चले ११ वर्ष ६ महिना सजाय घटाउने फैसला गरेपछि महान्यायाधीवक्ताको कार्यालयले पुनरावलोकन निवेदन दर्ता गरेको हो ।
प्रधानन्यायाधीश चोलेन्द्रशमशेर जबरा र न्यायाधीश तेजबहादुर केसीको संयुक्त इजलासले गरेको फैसलाउपर परेको पुनरावलोकन निवेदनमा यसअघि साे मुद्दामा संलग्न नरहेका ३ जना न्यायाधीशकाे पूर्ण इजलासमा सुनुवाइ हुने छ ।
यस मुद्दामा अब प्रधानन्यायाधीश चोलेन्द्र शमशेरसहित न्यायाधीशहरु तेजबहादुर केसी, पुरुषोत्तम भण्डारी, सुष्मलता माथेमा, मनोजकुमार शर्मा, आनन्दमोहन भट्टराई र सपना प्रधान मल्लले यो निवेदनमाथि सुनुवाइ र निर्णय गर्न पाउने छैनन् ।
सुनुवाइपछि फैसलामा गल्ती भएको लागेमा सर्वोच्चको पूर्ण इजलासले पुनरावलोकनको अनुमति दिने छ । अनुमति नदिएमा यो मुद्दाको औचित्य सकिने छ ।
पुनरावलाेकनकाे अनुमति पाएमा पुनरावलोकनका लागि छुट्टै इजलास गठन हुने छ । कुनै मुद्दाको पुनरावलोकन माग गरिए पहिले फैसला वा अन्तिम आदेश गर्ने न्यायाधीश बाहेकको इजलासबाट हेर्ने व्यवस्था छ ।
अनुमति दिइएमा कोइरालालाई म्याद तामेल गर्ने, तारेखमा बोलाउने र बहस गर्ने प्रक्रिया अगाडि बढ्छ । संवैधानिक व्यवस्थाअनुसार पुनरावलोकनको व्यवस्था भएकाले यसबाट अन्तिम टुङ्गो नलाग्दासम्म यो मुद्दा विचाराधीन बनेको छ ।
जनदबाब बढेपछि तुरुन्तै पेसी
सर्वाेच्चकाे फैसलाका विरुद्ध परेकाे पुनरावलोकनको निवेदनमा सुनुवाइका यति छिट्टै पेसी तोकिएको यो पहिलाे घटना हो । २०७२ साउन ११ गतेको संक्रमणकालीन न्यायसम्बन्धी पुनरावलोकनको निवेदन ५ वर्षपछि मात्रै टुंगिएकाे थियाे ।
तर जनस्तरबाटै प्रधानन्यायाधीशलाई महाभियाेग लगाउनुपर्ने माग भएपछि प्रधानन्याायधीश चोलेन्द्रशमशेर जबराले तुरुन्तै पेसी ताेकेका छन् ।
गत शुक्रबार दर्ता भएको पुनरावलोकनको निवेदनमाथि आइतबार नै सुनुवाइ हुने गरी पेसी ताेकिएकाे हाे ।
प्रकाशित मिति: आइतबार, साउन ११, २०७७
