काठमाडौं । नेपाली कांग्रेसका केन्द्रीय सदस्य गगन थापाले सरकारले स्थापना गरेको कोरोना कोषमा सबै सांसदको १ महिनाको तलब जम्मा गर्न प्रस्ताव गरेका छन् ।
सरकारले आइतबार नोभेल कोरोना भाइरस अर्थात कोभिड-१९ विरुद्ध लड्न कोरोना रोकथाम, नियन्त्रण कोष स्थापना गर्ने निर्णय गरेको थियो ।
उक्त कोषका लागि सरकारले ५० करोड जम्मा गर्ने र सरकारी कर्मचारीको १ महिनाको तलब उपलब्ध गराउने निर्णय गर्दै अन्य संघसंसंस्थाबाट पनि सहयोग गर्न आग्रह गरेको थियो ।
थापाले कोषमा सक्दो सहयोग गर्न ट्वीटरमार्फत आम नागरिकमा आह्वान गरेका छन् । साथै सरकारले यो विपदमा १ जना नागरिकलाई पनि अप्ठ्यारो पर्न नदिने गरी काम गर्नुपर्ने उनको भनाइ छ ।
उनले भनेका छन्, ‘सरकारको कोरोना कोषमा हामी प्रत्येक सांसदको १ महिनाको तलब जम्मा गरौं । जसले जहाँबाट जति सक्छौं यो कोषमा सहयोग गरौं र विपदमा स्राेत जुटाउन साथमा छौं भनेर सरकारलाई आश्वस्त पारौँ । संगैमा सरकारले पनि यो विपदमा एकजना नागरिकलाई पनि अप्ठ्यारो पर्नदिने छैन भनेर आश्वस्त पारोस् ।’
प्रकाशित मिति: सोमबार, चैत १०, २०७६ ०६:१७