काठमाडौं ।नेपाली कांग्रेसको भ्रातृ संस्था नेपाल विद्यार्थी संघ (नेविसंघ) ले पार्टीलाई आगामी प्रतिनिधिसभा चुनावअघि नै नियमित महाधिवेशन सम्पन्न गर्न आग्रह गरेको छ। २५ असोजमा सम्पन्न केन्द्रीय समिति बैठकका निर्णय सार्वजनिक गर्दै नेविसंघले पार्टीलाई भ्रष्टाचार र बेथितिबाट मुक्त पार्दै सुशासन र पारदर्शिता प्रवर्द्धन गर्नुपर्नेमा जोड दिएको छ।
संघले दलका सबै संरचनामा युवा र विद्यार्थीको सहभागिता बढाउन माग गर्दै भनिएको छ– “पार्टी, संसद्, संघीय, प्रदेश र स्थानीय तहमा कम्तीमा ४० प्रतिशत युवाको प्रतिनिधित्व सुनिश्चित गर्नुपर्छ।”
नेविसंघले कांग्रेसका सबै तहका पदाधिकारी तथा सदस्यहरूले हरेक वर्ष सम्पत्ति विवरण सार्वजनिक गर्नुपर्ने नीति बनाउन माग गरेको छ। साथै, अख्तियार दुरुपयोग अनुसन्धान आयोगलाई निष्पक्ष, पारदर्शी र दलीय भागबण्डाबाट मुक्त शक्तिशाली निकायको रूपमा रूपान्तरण गर्नुपर्नेमा पनि संघले जोड दिएको छ।
संघले जेन-जी आन्दोलनले उठाएका मुद्दा—भ्रष्टाचार, बेथिति र गैरजवाफदेहिताविरुद्धको आवाजलाई संस्थागत अभियानका रूपमा अघि बढाउने निर्णय गरेको छ। काठमाडौं महानगर प्रमुख बालेन्द्र शाहले आन्दोलन भड्काउने अभिव्यक्ति दिएको भन्दै संघले सरकारसँग छानबिनको माग गरेको छ।
भाद्र २३ र २४ का घटनामा संलग्न व्यक्तिहरूविरुद्ध निष्पक्ष अनुसन्धान र कानुनी कारबाही गर्न नेविसंघले सरकारलाई आग्रह गरेको छ। साथै, आन्दोलनका क्रममा सार्वजनिक सम्पत्ति जोगाउन सहयोग गर्ने व्यक्तिहरूलाई सम्मान गर्नुपर्ने माग पनि गरिएको छ।
राजनीतिक दलप्रतिको जनअसन्तोषको कारण आन्तरिक लोकतन्त्र र पारदर्शिताको अभाव भएको ठहर गर्दै संघले दलसम्बन्धी ऐनमा संशोधन गरी दलहरूलाई उत्तरदायी बनाउने व्यवस्था गर्न सुझाव दिएको छ।
संघले सामाजिक सञ्जालमा फैलिने भ्रामक सामग्री नियन्त्रण गर्न “सूचना निरीक्षण तथा प्रमाणीकरण संयन्त्र” निर्माण गर्न माग गरेको छ। अभिव्यक्ति स्वतन्त्रता कुण्ठित नगरी मिथ्या सूचना नियन्त्रण गर्न प्रभावकारी व्यवस्था गर्नुपर्ने संघको भनाइ छ।
नेविसंघले नेपालको परराष्ट्र नीतिमा असंलग्नता, पाँचशील, समानता र पारस्परिक सम्मानका सिद्धान्तलाई दीर्घकालीन मार्गदर्शकका रूपमा अंगीकार गर्नुपर्ने बताएको छ। संघले जेन-जी आन्दोलनपछि उत्पन्न भूराजनीतिक संवेदनशीलतालाई मध्यनजर राख्दै राष्ट्रिय स्वार्थ र सार्वभौमिकता जोगाउने सन्तुलित नीति अपनाउन सरकारलाई सुझाव दिएको छ।
प्रकाशित मिति: सोमबार, असोज २७, २०८२
