काठमाडौं । नेपाली कांग्रेस निकट नेपाल विद्यार्थी संघ (नेविसंघ) का अध्यक्ष दुजाङ शेर्पाले काठमाडौं महानगरपालिकाका मेयर बालेन शाह र ‘हामी नेपाल’का संयोजक सुधन गुरुङमाथि तत्काल छानबिन गर्न माग गरेका छन्।
अध्यक्ष शेर्पाले ती दुवै व्यक्तिको गतिविधिले राज्यको कानुनी संरचनामाथि खुलेआम चुनौती दिएको भन्दै सुरक्षा निकाय र प्रशासनलाई तत्काल कदम चाल्न आग्रह गरेका छन्।
उनले भने, “सिंहदरबार जलाउनुपर्छ भन्ने मान्छेले आन्दोलनको आह्वान गरेको छ। ती व्यक्तिलाई आज हामीले छानबिनको दायरामा ल्याउने कि नल्याउने ?”
शेर्पाले सुधन गुरुङले समेत राष्ट्रपति र प्रधानमन्त्रीजस्ता संवैधानिक पदमाथि सार्वजनिक चुनौती दिएका आरोप लगाउँदै भने, “अब पनि यो अराजकतालाई प्रहरी प्रशासनले नियन्त्रण गर्न सकेन भने त्यसको जिम्मा नेविसंघले लिनेछ।”
उनको भनाइ अनुसार, पछिल्ला दिनमा सामाजिक सञ्जाल र सडकमा राज्यविरुद्ध उत्तेजक गतिविधि बढ्दै गएको र त्यसप्रति सरकार र सुरक्षातन्त्र मौन बसेको जस्तो देखिएको छ।
राजनीतिक वृत्तमा शेर्पाको यो अभिव्यक्तिलाई ‘कडा चेतावनी’ का रूपमा हेरिएको छ।
प्रकाशित मिति: सोमबार, असोज २७, २०८२