काठमाडाैं । प्रमुख सत्तारुढ नेपाल कम्युनिस्ट पार्टी (नेकपा) को केन्द्रीय समिति बैठक सुरु भएको छ । तत्कालीन एमाले र माओवादी पार्टी एकीकरणपछि दोस्रो पटक नेकपा केन्द्रीय समिति बैठक बसेकाे हाे
पहिलो बैठक बसेको २१ महिनापछि बुधबार दोस्रो बैठक राष्ट्रिय सभागृहमा सुरु भएको हो । बैठकको सुरुमा प्रधानमन्त्री तथा पार्टी अध्यक्ष केपी शर्मा ओलीले सम्बोधन गरेका छन् ।
बैठकलाई सम्बाेधन गर्दै अध्यक्ष ओलीले सरकार र पार्टीविरूद्ध प्रचार युद्ध छेडिएको बताए । हाम्रा विरुद्ध प्रचार डरलाग्दो गरी छेडिएको छ । प्रचार आक्रमण भइरहेको छ । यो प्रचार युद्ध होइन, युद्ध त दोहोरो हुन्छ । आक्रमण मात्रै हो , उनले भने ।
प्रधानमन्त्री ओलीले सरकार वादविवादबाट नभएर उपलब्धि, परिणाम र नतिजाबाट सरकाविरोधीलाई जवाफ दिइरहेको दाबी गरे । हामी वादविवादबाट होइन, उपलब्धि, परिणाम र नतिजाबाट जवाफ दिँदै आएका छाैं , उनले भने ।
सरकारका केही कमीकमजोरी भएको स्वीकार गर्दै उनले २ बर्से कार्यकालमा सरकारले संविधान कार्यान्वयनमा महत्वपूर्ण उपलब्धि हासिल गरेको जिकिर गरे ।
ओलीले भावनामा बदलेर मात्र क्रान्ति नहुनेमा जोड दिए । ‘भावनामा बगेर मात्र होइन यथार्थमा जोड दिनुपर्छ,’ उनले भने । वैचारिक रूपमा पार्टीका नेता/कार्यकर्ता प्रष्ट हुनुपर्ने उनले बताए ।
बैठकमा आजै अर्का अध्यक्ष पुष्पकमल दाहाल ‘प्रचण्ड’ले राजनीतिक प्रतिवेदन पेस गर्ने छन् भने महासचिवले संगठन तथा विधान संशोधन प्रस्ताव पेस गर्ने छन् ।
आमन्त्रित स्थायी समिति सदस्यसहित केन्द्रीय समिति बैठकमा ४ सय ४७ सदस्य सहभागी हुने नेकपा स्राेतले जनाएकाे छ ।
प्रकाशित मिति: बुधबार, माघ १५, २०७६
