काठमाडौं । नेपाल कम्युनिस्ट पार्टी प्रदेश नम्बर २ का अध्यक्ष प्रभु साहले विद्यालयलाई पैसा कमाउने तथा राज्य कोषको दोहन गर्ने भाँडोको बनाएका शिक्षक नहट्दासम्म गुणस्तरीय शिक्षा सम्भव नभएको बताएका छन् ।
बिहीबार एक कार्यक्रममा बोल्दै अध्यक्ष साहले राज्यले जनतालाई शिक्षित बनाउन संचालन गरेका विद्यालयबाट पढाउनको सट्टा शिक्षकले पैसा कमाउनमा ध्यान केन्द्रित गर्दा शिक्षा क्षेत्रमा बेथिति सिर्जना भएकाे आरोप लगाए ।
विद्यालय व्यवस्थापन, संरचना निर्माण, विद्यार्थीलाई सहुलियतजस्ता विभिन्न शीर्षकमा राज्यले पठाउने बजेट हिनामिनामा मात्र शिक्षकको ध्यानसँग भएकाले त्यस्ता शिक्षकलाई बर्खास्त गर्नुको विकल्प नभएको उनको जिकिर छ ।
अध्यक्ष साहले भने, विगत लामो समयदेखि शिक्षा क्षेत्रमा ठूलो बेथिति जरा गाडेर बसेको छ । त्यो के हो भने एकातिर विद्यालयमा गाउँका मुखिया महाजनले आफ्ना छोराछोरी शिक्षक भर्ती गरेर राख्नु र अर्कोतिर विद्यालयलाई पैसा कमाउने भाँडो बनाएर शिक्षक बन्नु । र यही कारणले आजसम्म शैक्षिक क्षेत्रमा सुधार हुन सकेको छैन ।
उनले थपे, ती मुखिया महाजनका छोराछोरी भलै पढाउन नजानुन तर तिनीहरु आफुलाई शिक्षा क्षेत्रको ठेक्केदारको रुपमा उभ्याएर बेथिति सिर्जना गरेका छन् । राज्यको तलब खाने तर शिक्षामा गुणस्तर कायम गर्न नसक्ने त्यस्ता शिक्षक समाजका सत्रु हुन् । पैसा कमाउन र राज्यकोषको सम्पत्ति दोहन गर्नका लागि शिक्षक बनेकाहरुलाई बर्खास्त नगरेसम्म गुणस्तरीय शिक्षा असम्भव छ । त्यसैले राज्य एवं समाज यसप्रति गम्भीर हुनैपर्छ ।
प्रकाशित मिति: बिहीबार, पुस २४, २०७६ ०६:५०
