काठमाडौँ । भारत सरकारले नयाँ नक्सामा नेपालसँगको सिमानामा कुनै परिवर्तन नगरिएको दाबी गरेको छ ।
भारतले कालापानी क्षेत्रको नेपाली भूमि मिचेको भन्दै नेपालमा व्यापक विरोध भइरहेको बेला उसले नक्सा ठीक भएको दाबी गरेको हो । भारतीय विदेश मन्त्रालयमा बिहीबार आयोजित पत्रकार सम्मेलनमा भारतका विदेश मन्त्रालयका प्रवक्ताले त्यस्तो दावी गरेका हुन् ।
प्रवक्ता रवीशकुमारले नयाँ नक्साले भारतको यथार्थ सार्वभौम क्षेत्रलाई समेटेको दाबी गर्दै भने, ‘नयाँ नक्सामा कुनै पनि हिसाबले नेपाल भारत सीमा परिमार्जन गरिएको छैन ।’
भारतको नयाँ नक्सालाई लिएर नेपालमा व्यापक विरोध भएको र नेपालले पनि एकपक्षीय निर्णय अस्वीकार्य हुने बताएको भन्दै भारतको आधिकारिक धारणा मागिएको थियो।
नेपालसँगको सीमा समीक्षाका विषयमा विद्यामान संयन्त्रबीच छलफल भइरहको उनको भनाइ छ।
प्रकाशित मिति: बिहीबार, कात्तिक २१, २०७६ १२:०३