काठमाडौं । सिंगापुरमा दुई साता लामो उपचार गराएर आज फर्केका प्रधानमन्त्री केपी शर्मा ओलीको स्वास्थ्य अवस्था सामान्य रहेको र नियमित काम गर्न सक्ने प्रधानमन्त्रीका निजी चिकित्सकले जानकारी दिएका छन् ।
प्रधानमन्त्रीकी निजी चिकित्सक डा. दिव्यासिंह शाहले विज्ञप्ति जारी गर्दै उनको स्वास्थ्य अवस्था सामान्य रहेको र नियमित कामलाई निरन्तरता दिन सक्ने जानकारी दिएकी हुन् ।
डा. सिंहले विज्ञप्तिमा प्रधानमन्त्री ओलीको शरीरमा बढी मात्रामा रहेको एन्टीबडीलाई वैज्ञानिक प्रविधिबाट हटाइएको र उनले अब आफ्नो नियमित कामलाई निरन्तरता दिनसक्ने जानकारी दिएकी हुन् । विज्ञप्तिमा उल्लेख छ, ‘हाल उहाँको स्वास्थ्य अवस्था सामान्य छ र आफ्नो नियमित कामलाई निरन्तरता दिन सक्नुहुन्छ ।’
मिर्गौलामा समस्या देखिएर उपचारका लागि सिंगापुरमा उपचार गराएर फर्किएका प्रधानमन्त्रीको उपचारपछिको स्वास्थ्य अवस्थाबारे धेरैलाई चासो छ । प्रधानमन्त्री पहिलो पटक सिंगापुरमा उपचार गराएर फर्केको एक सातामै फेरि उपचारका लागि गएकाले धेरैले प्रधानमन्त्रीको स्वास्थ्यका बारे चासो राखेका हुन् ।
यसअघि साउन १८ मा स्वास्थ्य उपचारका लागि गएर २७ गते फर्कने क्रममा पनि प्रधाननमन्त्रीले आफू ठीक भएको प्रतिक्रिया दिएका थिए ।
प्रकाशित मिति: शुक्रबार, भदौ २०, २०७६ १८:५९
