काठमाडाैं । सिंगापुरमा दुई साता लामो उपचारपछि प्रधानमन्त्री केपी शर्मा ओली शुक्रबार स्वदेश फकिएका छन् ।
थाई एयरवेजको विमानबाट मध्याह्न १२ः०५ मा त्रिभुवन विमानस्थलमा प्रधानमन्त्री ओली अवतरण गरेका हुन् ।
विमानस्थलमा प्रधानमन्त्रीलाई कार्यवाहक प्रधानमन्त्री ईश्वर पोखरेल, सभामुख कृष्णबहादुर महरा, गृहमन्त्री रामबहादुर थापा, नेकपा संसदीय दलका उपनेता सुवास नेम्बाङ, परराष्ट्रमन्त्री प्रदीपकुमार ज्ञवालीलगायतले स्वागत गरेका थिए ।
मिर्गौलासम्बन्धी उपचारका लागि दुई साताअघि प्रधानमन्त्री ओली सिंगापुर गएका थिए । सिंगापुरस्थित नेसनल युनिभर्सिटी अस्पतालमा सात चरणमा प्लाज्मा फेरसिस विधिबाट उनको मिर्गौलाको उपचार गरिएको थियो । बुधबार उपचार सम्पन्न भएको प्रधानमन्त्री ओलीको निजी सचिवालयले जनाएको छ ।
ओलीसँगै उनलाई लिन सिंगापुर पुगेका नेकपा सचिवालय सदस्य वामदेव गौतम र विष्णु पौडेल पनि स्वेदश फर्किएका छन् । प्रधानमन्त्रीले बोलाएपछि पौडेले मंगलबार र गौतम बुधबार सिंगापुर गएका थिए।
प्रधानमन्त्रीसँगै भदौ ५ गते नै सिंगापुर गएका प्रमुख राजनीतिक सल्लाहकार विष्णु रिमाल र निजी डाक्टरहरु दिव्या सिंह र दिलीप शर्मा यसअघि नै फर्किसकेका छन् भने प्रधानमन्त्री पत्नी राधिका शाक्य र स्वकीय सचिव राजेश ब्रजाचार्य भने आज फर्किएका छन् ।
प्रधानमन्त्री ओलीको प्रतीक्षामा बिहानैदेखि बसेका मिडियाहरु भने प्रधानमन्त्रीको प्रतिक्रियाबिनै फर्किनुपरेको छ । हात हल्लाउँदै एरपोर्टबाट बाहिर निस्किएका प्रधानमन्त्री ओली त्यहाँबाट बालुवाटारतिर लागेका थिए ।
प्रकाशित मिति: शुक्रबार, भदौ २०, २०७६ १७:१२