काठमाडौ । वन तथा वातावरणमन्त्री शक्तिबहादुर बस्नेतले शहरबजारबाट उत्पन्न हुने फोहर व्यवस्थापनका लागि सधै ‘ल्याण्डफिल साइट’ खोजेर मात्र समस्याको समाधान नहुने बताएका छन् ।
उनले सरकार सो समस्याको समाधानका लागि गम्भीर भएर वैकल्पिक उपाय खोजीमा लागेको स्पष्ट पारे । प्रतिनिधिसभाको बुधबारको बैठकमा सांसदका प्रश्नको जवाफ दिँदै उनले फोहरको स्रोतबाटै कुहिने नकुहिने छुट्याउन लगाई काम लाग्ने फोहरलाई पुनःप्रयोग गर्ने र फोहरबाट ऊर्जासमेत उत्पादन गर्ने काम भइरहेको जानकारी दिए ।
सांसद सुजाता परियारले फोहर स्रोतमै छुट्याएर किन व्यवस्थापन गरिँदैन भनी पूरक प्रश्नगरेकी थिइन् । सांसद नारायणप्रसाद खतिवडाले नुवाकोटको ओखरपौवाको फोहरबाट मल उत्पादन गर्ने योजना केही छ कि भनी पूरक प्रश्न गरेको थिए ।
जवाफमा मन्त्री बस्नेतले चुरे व्यवस्थापनका लागि मन्त्रालयले राष्ट्रिय गौरवको आयोजना सञ्चालन गरिरहेको बताउँदै यो विषय सरकारको प्राथमिकतामा रहेको उल्लेख गरे ।
प्रकाशित मिति: बुधबार, भदौ १८, २०७६ २२:५१