सङ्घीय मामिला तथा सामान्य प्रशासनमन्त्री लालबाबु पण्डितले सरकारले कुनैपनि कर्मचारीको अनुहार हेरेर सरुवा बढुवा नगर्ने बताएका छन्।
प्रेस सङ्गठनले आज कुश्मामा आयोजना गरेको पत्रकार भेटघाट कार्यक्रममा बोल्दै उनले स्वेच्छाचारी ढङ्गले नभइ योग्यता, क्षमता, ज्येष्ठता र प्रणालीको परिधिभित्र रहेर निजामती सेवाका कर्मचारीको बढुवा र जिम्मेवारी तोकिने बताए । मुख हेरेर प्रणाली स्थापित हुन नसक्ने उल्लेख गर्दै निर्ममम ढङ्गले निर्णय लिइने बताए ।
मन्त्री पण्डितले तिहारभित्र लोकसेवा आयोगले नतिजा प्रकाशन गरिसक्ने बताउँदै त्यसपछि कुनै पनि तहमा कर्मचारीको अभाव नहुने जिकिर गरे । उनका अनुसार अहिले झण्डै ३२ हजार कर्मचारीको अभाव रहेको छ । उनले लोकसेवा आयोगले इतिहासमै पहिलोपटक ठूलो सङ्ख्यामा कर्मचारी भर्ना गर्न लागेको बताए । उनले यो वर्षदेखि सेवा प्रवाहमा कुनै समस्या नहुनेसमेत जानकारी गराए ।
मन्त्री पण्डितले सङ्घीय निजामती ऐन अन्तिमचरणमा रहेकाले यसै साता संसद्बाट पारित हुने बताए । उनले काम गर्नेलाई प्रोत्साहन र नगर्नेलाई कारवाही गर्ने गरी ऐन ल्याउन लागिएको जानकारी दिनुभयो । उनले कार्यालय समयमा कर्मचारी टे«ड यूनियन नहुने उल्लेख गर्दै सामूहिक राजीनामा दिनेलाई तत्काल बिदाइ गरिने बताए ।
प्रकाशित मिति: शुक्रबार, साउन ३१, २०७६ २२:४२
