काठमाडौँ । ऐतिहासिक फिल्म ‘नालापानी’लाई कर छुट दिन आग्रह गर्दै चलचित्र विकास बोर्डले अर्थ मन्त्रालयलाई पत्राचार गरेको छ ।
बोर्ड अध्यक्ष भुवन केसीले नेपाल-अङ्ग्रेजबिचको नालापानी युद्धबारे बनेको फिल्मलाई कर छुट दिन पहल गरेको बताए । यसबारे बुधबार सञ्चार सचिव वैकुण्ठ अर्यालसँग भेटेर पनि अध्यक्ष केसीले यस विषयमा आग्रह गरेका थिए ।
यसबारे केसीले भने, ‘नेपालको गौरव गाथा बोकेको फिल्म पनि भएकाले बोर्डले विशेष फिल्म घोषणा गरी राष्ट्रपतिबाट सम्मान प्राप्त गरिसकेको छ । सोहीअनुसार मैले कर छुटको लागि योग्य छ भनेर पत्राचार गरेको हुँ ।’
हलमा देखाइने विज्ञापन खर्चमा पनि सहजीकरण गर्न आफूले पहल गरेको उनले बताए । केसीले यस प्रकारका राष्ट्रिय गौरव बोकेका फिल्मलाई प्रवर्द्धन गर्नुपर्छ भन्ने आफ्नो उद्देश्य रहेको बताए ।
सन् १८१४ मा देहरादुनस्थित नालापानी गढीमा भएको अङ्ग्रेज–नेपाल युद्धमा नेपाली फौजका तर्फबाट कप्तानी गरेका बलभद्र कुँवरले लडेको ऐतिहासिक लडाइँलाई आधार बनाएर ‘नालापानी’ निर्माण भएको हो ।
प्रकाशित मिति: बिहीबार, असोज २७, २०७९ १२:५०
