भोजपुर : पूर्वी पहाडी जिल्ला संखुवासभाको सिलिचुङ गाउँपालिका २ माक्रुडाँडामा शनिबार बिहान आगलागी हुँदा छ लाख रूपैयाँबराबरको क्षति भएको छ ।
सोही स्थान बस्ने जंगबहादुर राईको घरमा बिहान ६ बजेतिर बिजुलीको तार सर्ट भई आगलागी हुँदा राईको ढुंगा माटो र काठले बनेको फुसको छानो भएको दुई तले घर, घरभित्र रहेको अन्नपात, लत्ताकपडा, भाँडाबर्तन र नगद सात हजार रूपैयाँ नष्ट भएको प्रहरीले जनाएको छ ।
प्रहरी चौकी सिस्वाटारबाट गएको प्रहरी टोली र स्थानीयको सहयोगमा आगो पूर्णरूपमा नियन्त्रणमा आएको जिल्ला प्रहरी कार्यालय संखुवासभाले जनाएको छ ।
अग्निपीडितलाई राहत
यस्तै, आगलागीबाट घरबार गुमाएका भोजपुरको सानोदुम्माका तीन अग्नि पीडित परिवारलाई गाउँपालिकाले राहत प्रदान गरेको छ । भोजपुरको पौवादुम्मा गाउँपालिकाले राहत प्रदान गरेको हो । गाउँपालिकाले फागुन २८ गते भएको आगलागीका पीडित चितमान राई, मनकुमार राई र बद्रसिंह राईलाई राहत वितरण गरेको हो ।
गाउँपालिकाले अन्नपात, भाँडाकुँडासँगै चितमानलाई नगद नौ हजार, मनकुमारलाई १० हजार र बद्रसिंहलाई आठ हजार रुपैयाँ आर्थिक सहयोग गरेको गाउँपालिकाले जनाएको छ । गाउँपालिकाको विपद् व्यवस्थापन कार्यविधि अनुसार गाउँपालिकाले सहयोग गरेको उपाध्यक्ष सम्झना राईको भनाइ छ । सो आगलागीमा परी तीन घर जल्दा करिब १५ लाखभन्दा बढीको क्षति भएको प्रहरीले जनाएको छ ।
प्रकाशित मिति: आइतबार, चैत ३, २०७५
