काठमाडौं : नेपाल पिछडावर्ग (ओबीसी) महासंघले चार्टर एकाउन्टेन्ट श्यामकुमार महतोको असामयिक निधनप्रति गहिरो दुःख व्यक्त गरेको छ । उनलाई श्रद्धाञ्जली दिन आयाेजित सभामा सहभागीहरूले उनको योगदानका चर्चा गरेका थिए ।
महासंघले शनिबार मधेस मिडिया हाउसमा आयाेजित श्रद्धाञ्जली सभामा स्व. महतोको निधनले पिछडावर्गले मात्र नभई समग्र राष्ट्रले नै एउटा होनहार र दूरदर्शी व्यक्तित्व गुमाएको वक्ताहरूले बताएका छन् ।
स्व.महतो महासंघका पूर्वकार्यबाहक अध्यक्ष एवं केन्द्रीय सल्लाहकार तथा जनकपुर चुरोट कारखानाका पूर्व महाप्रबन्धकको रूपमा समेत काम गरिसकेका छन् । गत माघ २२ गते ५९ वर्षको अल्पायुमै उनको निधन भएको थियो । कार्यक्रममा प्रतिनिधिसभा सदस्य तथा नेपाली कांग्रेसका नेता सीताराम मेहताले महतोको निधनबाट समाज र राष्ट्रका निम्ति ठूलो क्षति भएको बताए ।
यसैगरी, महासंघ अध्यक्ष कौशलकुमार सिंहले महतोको निधनबाट खासगरी पिछडावर्गलाई अपूरणीय क्षति भएको बताएका छन् । उनले स्व.महतोप्रति श्रद्धाञ्जली व्यक्त गर्दै परिवारजनप्रति सम्वेदना प्रकट गरेका छन् ।
श्रद्धाञ्जली सभा कार्यक्रममा महासंघका पदाधिकारीहरूले स्व. महतोप्रति श्रद्धाञ्जली व्यक्त गर्दै समाज र राष्ट्रका लागि दिएको योगदान सदैव स्मरणीय रहने बताएका छन् । कार्यक्रम सञ्चालन सिएन खड्गले गरेका थिए ।
प्रकाशित मिति: शुक्रबार, चैत १, २०७५
