काठ्माडाैं : शिक्षा सेवाका कर्मचारीलाई समायोजनमा भेदभाव गरिएको भन्दै ध्यानाकर्षण धर्ना बस्न गएका शिक्षा सेवाका उपसचिव ईश्वरीप्रसाद पोखरेललाई प्रहरीले पक्राउ गरेको छ । १४ बुँदे मागसहित आजदेखि माइतीघरमा धर्ना बस्न लागेका उपसचिव पोखरेललाई पक्राउ गरी सिंहदरबार प्रहरी वृत्तमा राखिएको छ ।
उपसचिव पोखरेलले सार्वजनिक जवाफदेहिता सुनिश्चित नभएको, सार्वजनिक पदको दुरुपयोग गर्नेलाई दण्डित हुने अवस्था नभएको, सार्वजनिक पदाधिकारीबाट अन्याय भएका कारण समाधानको माग राख्दै धर्ना कार्यक्रम राखेका थिए । यस्तै प्रशासन सेवाका नासु र खरिदारको समायोजन हुँदा अन्य सेवाका कर्मचारीको मानमर्यादा समाप्त हुने गरी समायोजन गरिएको, समायोजनको नाममा संघीय निजामती, प्रदेश निजामती र स्थानीय सेवा कानुनको व्यवस्थाबिना विभेदकारी व्यवस्थाले जागिरको विकास र सेवा सुविधाको सुनिश्चितता नभएको लगायत १४ बुँदे माग छन् ।
माइतीघर मण्डलामा शान्तिपूर्ण धर्नामा बस्दा प्रहरीले धरपकड गरेको भन्दै आजको न्युजसँग उनले भने, ‘धर्ना बस्न ठाउँको माग गरेको छु, केही समय पर्खिन भनेको छ । हेरौं के हुन्छ, मेरो धर्ना कार्यक्रम जारी नै रहन्छ ।’
प्रकाशित मिति: बिहीबार, फागुन ३०, २०७५
