गलेश्वर ः बजार संरक्षणको बाहनामा म्याग्दी सदरमुकाम बेनीमा कालीगण्डकी नदीको दोहन भएको छ ।
बजार संरक्षणका लागि पर्खाल लगाउने भन्दै जथाभावी नदी किनाराका ढुङ्गा र बालुवा निकाल्दा जोखिम बढेको हो । निर्माण समितिले नदी किनारमा पर्खाल लगाउने वहानामा ठूला ठूला ढुङ्गा निकालेपछि स्थानीयवासीले बेनी नगरपालिकामा गुनासो गरेका छन् । गुनासो आएपछि नगरपालिकाले उपभोक्ता समितिलाई सचेत गराएको छ । रुपाताल एकीकृत संरक्षण समितिमार्फत नदी कटानबाट बजारलाई जोगाउने उद्देश्यले सञ्चालित योजनाको उपभोक्ता समितिले स्काभेटर प्रयोग गरेर किनारका ठूला ढुङ्गा फुटाउँदा थप जोखिम बढेको गण्डकी प्रदेशसभा सदस्य विनोद केसीले बताए ।
अनुगमनपछि नदीमा किनारका ढुङ्गा निकालिएको पुष्टि भएपछि उपभोक्ता समितिका पदाधिकारीलाई नगरपालिकामा बोलाएर जथाभावी ढुङ्गा ननिकाल्न र उपकरण प्रयोग नगर्न सचेत गराएको नगर कार्यपालिकाका सदस्य कृष्णकुमार विश्वकर्माले बताए । रुपाताल संरक्षण समितिले पुरानो पर्खाल संरक्षण र गत भदौको बाढीले बगाएको ठाउँमा ग्याबियन पर्खाल निर्माणका लागि ४ वटा उपभोक्ता समितिमार्फत काम गरेको छ । समितिले बिनाप्रतिस्पर्धा सीमित व्यवसायीको उपकरण प्रयोग गरेको, उपभोक्ता परिचालन गरेर गर्नुपर्ने काम घुमाउरो शैलीमा ठेक्कामा लगाएको, ग्याबियन जालीमा चलखेल गरेको लगायतका गुनासो बजारवसीले गरेका छन् ।
समितिको चलखेलका कारण गुणस्तरीय काम नहुने र संरक्षणको नाममा विनाश हुन सक्नेतर्फ बजारवासीको गुनासो बढ्न थालेको छ । ४ वटामध्ये ८ नम्बर वडाको एउटा उपभोक्ता समितिका अध्यक्ष उत्तमकुमार कर्माचार्यले भने बजारवासीको आशङ्का सत्य नभएको बताएका छन् ।
म्याग्दी बेनीतर्फ कालीगण्डकी किनारमा ७६० थान ग्याबियन पर्खाल लगाइने भएको छ । बेनी बजार संरक्षणका लागि चालू आवमा ३ करोड ५० लाख बजेट छुट्याइए बजेट सम्झौताकव विवरण सार्वजनिक गरिएको छैन ।
प्रकाशित मिति: शनिबार, फागुन २५, २०७५
