झापा: महिला आन्दोलनको नेतृत्वदायी भूमिका निर्वाह गरेका क्रान्तिकारी महिला नेत्री योगमाया न्यौपानेको शालिक आज झापाको कनकाई नगरपालिकामा अनावरण गरिएको छ ।
१०९ औ अन्तर्राष्ट्रिय नारी दिवसको अवसरमा कनकाई–३ मा निर्मित योगमायाको अर्धकदको शालिक झापा क्षेत्र नं २ का सांसद पवित्रा खरेलले अनावरण गरेकी हुन् । सांसद खरेलले ७७ वर्ष पहिले महिला मुक्तिका लागि योगमायाले थालेको आन्दोलनबाट महिला मुक्ति र समानताका लागि देशमा अवसर प्राप्त भएको बताए ।
शालिक निर्माणमा कनकाई नगरपालिकाले रु १८ लाख, कनकाई सामुदायिक वनले रु ५१ हजार र स्थानीयवासी तुलाराज बस्नेतले रु ५० हजार सहयोग गरेको योगमाया शालिक निर्माण समितिका अध्यक्ष शर्मिला कुँवरले जानकारी दिए ।
आन्दोलनका क्रममा १९९८ सालमा योगमायाको नेतृत्वमा ६८ महिलाले अरुण नदीमा हाम फालेर जलसमाधि लिएको इतिहास रहेको उपप्रमुख प्रसाईंले बताए। योगमाया महिलाको पक्षमा जीवन आहूति गर्ने सशक्त महिला थिईन् । योगदानको सम्मान र सम्झनाका लागि शालिक निर्माण गरिएको हो ।
शालिक निर्माण गरिएको स्थानलाई ‘योगमाया चोक’ नामकरण गरिएको छ ।
प्रकाशित मिति: शनिबार, फागुन २५, २०७५
