भारतमा सम्पन्न पत्रकार कुम्भमेलामा नेपाली पत्रकार अशोक सिलवाल विशेष अतिथिका रूपमा सहभागी भई भर्खरै नेपाल फर्किएका छन् ।
कर्नाटक युनियन अफ वर्किङ जर्नालिस्ट एसोसिएसन (केयुडब्लुजेए) र मैसुर डिस्ट्रिक जर्नालिस्ट एसोसिएसन (एमडीजेए) को कर्नाटक राज्यको मैसुरस्थित सुतुरश्री क्षेत्रमा संयुक्त आयोजित दुईदिने भव्य भेलामा कर्नाटक राज्यका झन्डै २५ सय पत्रकार सहभागी थिए ।
राज्यस्तरको यो ३४औं पत्रकार भेलालाई कर्नाटकका मुख्यमन्त्री एचडी कुमारास्वामीले सम्बोधन गरेका थिए । उक्त भेलामा विशेष अतिथि र ‘भिडियो जर्नालिजम : न्यु च्यालेन्जेज’ शीर्षकको सेसनको उद्घाटन र भाषणका लागि भने त्यहाँ सिलवाललाई निम्त्याएको थियो । सो भेलामा विशेष अतिथिका रूपमा नित्याइएका लाङटाङ सद्भावना दूतसमेत रहेका लेखक सिलवाल पहिलो नेपाली पत्रकार हुन् ।
कार्यक्रममा कर्नाटकका पूर्वमुख्यमन्त्रीद्वय सिद्धारामई, बीएस यदुरप्पा, उपमुख्यमन्त्री जी परमेश्वर, कर्नाटकका उच्च शिक्षामन्त्री जीटी देवेगौडा, श्री श्री श्री शिवराथ्री देशीकेन्द्र स्वामीजी, श्री श्री श्री निर्मलानन्द स्वामीजी, श्री श्री श्री चारुकृथी भट्टराका स्वामीजी, आइएफडब्लुजे अध्यक्ष बीभी मल्लिकार्जुनाइया, आइएफडब्लुजे महासचिव परमानन्द पाण्डे, एमडीजेए अध्यक्ष सीके महेन्द्रा, श्रीलंकाको डेली मिररका समाचार सम्पादक केके कार्यकरवाना, फोटोग्राफर गीतिका तालुकदारलगायत अतिथिका रूपमा निम्त्याइएका थिए ।
सो मेलामा पुराना फोटा, प्रिन्टिङ मेसिन, रेडियो, क्यामरा तथा टिभी प्रदर्शनीमा राखिएका थिए । साथै पत्रकारिता क्षेत्रसँग सम्बन्धित अनेक विषय र आयामबारे अनेक अन्तरक्रिया भएका थिए । वरिष्ठ पत्रकारहरूको सम्मानसमेत गरिएको सो दुईदिने उत्सवमा कर्नाटकका अधिकांश सम्पादक, संवाददाताका, मिडिया अध्येता र विद्यार्थीको समेत उल्लेख्य उपस्थिति थियो । विद्यार्थीले पूर्वमुख्यमन्त्रीसँग राजनीति, फेक न्युज आदिबारे छलफल गरेका थिए । मिडिया र राजनीति, मास मिडिया स्वसञ्चालन नीति, मिडिया एन्ड डिजिटलाइजेसन च्यालेन्जेज, फोटो पत्रकारिता, बदलिँदो फोटोग्राफी दुनियाँ, मिडिया र लैंगिक संवेदनशीलतालगायत दर्जनौं विषयमा सघन अन्तरक्रिया भएको थियो । कार्यक्रममा राज्यका विभिन्न भागमा कार्यरत पत्रकारबीच भेटघाट र पुनर्मिलनको अवसरसमेत जुटेको थियो ।
सन् १९३४ मा स्थापित एमडीजेएमा पत्रकारको दक्षता, पेसा र वृत्ति विकासका लागि सक्रिय उक्त कर्नाटक राज्यका सबै जिल्ला एसोसिएसन आबद्ध छन् भने एमडीजेए इन्डियन फेडरेसन अफ वर्किङ जर्नालिस्ट (आइएफडब्लुजे) नयाँ दिल्लीसँग आबद्ध छ ।
। सिंगो सहर, पत्रकार भेलाका लागि सजिएको अनभुव हुन्थ्यो,’ नेपाल फर्केपछि पत्रकार सिलवालले भने, ‘त्यत्रो ठूलो कार्यक्रममा भारतीय मित्रहरुले मलाई प्रदान गरेको त्यो सम्मान मेरो व्यक्तिगतभन्दा पनि नेपाल राष्ट्रको सम्मान हो ।’
यसअघि श्रीलंकाकै सबभन्दा पुरानो पत्रकार संस्था श्रीलंका प्रेस एसोसिएसन (एसएलपिए)ले आफ्नो ६३औं वार्षिकोत्सवको आयोजना गरेको थियो । सो अवसरमा आयोजित विशेष कार्यक्रममा पनि नेपालका तर्फबाट विशेष अतिथिका रूपमा पत्रकारिता, पर्यटन र प्राध्यापनमा एकसाथ सक्रिय सिलवाललाई पहिलो पटक निम्त्याएको थियो ।
प्रकाशित मिति: शुक्रबार, फागुन २४, २०७५
