काठमाडौ : काठमाडौ क्षेत्र नम्बर तीन (क) का सांसद छिरिङ दोर्जे लामा र उनकी पत्नी अनु प्रसाई लामाले आफ्नो पुत्रको अन्नप्राशन (पास्नी) गर्दा लाग्ने खर्च एक सामाजिक संस्थालाई प्रदान गरेका छन् ।
शिवरात्रिकाे अवसर पारेर लामा दम्पत्तीले अन्नप्राशन गर्दा लाग्ने खर्च चार लाख रुपैयाँ बौद्धिक अपाङ्गता भएका बालबालिकाहरुका लागि काम गर्दै आएको संस्था नयाँ जीवन नेपाललाई प्रदान गरे ।
उनीहरुले आफ्नो पुत्रको अन्नप्राशन भोज नगरी उक्त रकम उक्त संस्थालाई हस्तान्तरण गरेका हुन् । सो अवसरमा काठमाडौं महानगरपालिका वडा नम्बर ६ का वडाध्यक्ष दिपेन लामाले पनि एक महिनाको तलब उक्त संस्थालाई सहयोग गर्ने प्रतिवद्धता गरे ।
गोकर्णेश्वर नगरपालिका वडा नम्बर ६ का वडाध्यक्ष रमेश अर्याल र ८ का वडाध्यक्ष मनोज ढुङ्गानाले पनि संस्थालाई सहयोग गर्ने वचन दिएको संस्थाले जनाएको छ । त्यस्तै लायन्य क्लबका पूर्व गर्भनर तथा समाजसेवी कुमारराज सुवेदीले पनि संस्थालाई ४३ इन्चको टेलिभिजन र संस्थालाई आवश्यक भौतिक सामाग्री प्रदान गर्ने प्रतिवबद्धता ब्यक्त गरेका छन् ।
प्रकाशित मिति: मंगलबार, फागुन २१, २०७५
