काठमाडौं : शुक्रबार नेपालका लागि जनवादी गणतन्त्र चीनकी राजदूत हो याङ्की र नेपाल प्रज्ञाप्रतिष्ठानका पदाधिकारीहरूबीच कमलादीस्थित प्रज्ञा भवनमा भेटवार्ता भएको छ ।
भेटवार्तामा नेपाल र चीन दुई देशबीच प्राज्ञिक तथा सांस्कृतिक सम्बन्ध विस्तारबारे छलफल भयो । प्रज्ञाप्रतिष्ठानका कुलपति गङ्गाप्रसाद उप्रेतीले राजदूत याङ्कीलाई स्वागत गर्नुहुँदै नेपाल प्रज्ञाप्रतिष्ठान र प्रतिष्ठानले गरेका प्राज्ञिक गतिविधिबारे प्रकाश पारे । कुलपतिले नेपाल र चीनबीच निकै पुरानो सम्बन्ध रहेको उल्लेख गर्दै प्रज्ञाप्रतिष्ठान र चीनका दुई साहित्यिक तथा सांस्कृतिक संस्थाबीच सम्झौता भई प्राज्ञिक आदानप्रदान कार्य भइरहेको बताए ।
राजदूत याङ्कीले दक्षिण एसियामा अवस्थित नेपाल संस्कृति, भाषा र साहित्यले सुसम्पन्न मुलुक रहेको बताइन् । उनले दुईवटा संस्कृति भएका देशका बीचमा रहेको नेपालले दुवै मुलुकलाई जोड्न सेतुको काम गरेको उल्लेख गर्दै उत्तरतर्फ ह्वाङ हो नदी र दक्षिणतर्फ गङ्गा नदीको विशाल संस्कृतिलाई नेपालले जोडेको बताइज् । राजदूतले नेपाल प्रज्ञाप्रतिष्ठान र चीनका दुई साहित्यिक तथा सांस्कृतिक संस्थाबीच सहकार्य भइरहेकामा खुसी प्रकट गर्दै नेपाल प्रज्ञाप्रतिष्ठानकै अगुवाइमा चीन तथा दक्षिण एसिया साहित्यिक सभा स्थापना भई पहिलो सम्मेलन चीनमा सम्पन्न भएको र उक्त सभाको दोस्रो सम्मेलन आगामी वर्षको अक्टोबरमा नेपालमा आयोजना हुन लागेकोमा प्रशन्नता व्यक्त गर्दै त्यसका लागि चिनियाँ दूताबासबाट आवश्यक सहयोग हुने प्रतिबद्धता व्यक्त गरिन् ।
राजदूत याङ्कीले प्रज्ञा भवन, छापाखाना, पुस्तकालयसमेतको अवलोकन गरेकी थिइन् ।
प्रकाशित मिति: शनिबार, फागुन १८, २०७५
-1732776560.jpg)
