काठमाडौं : नेपाल जनस्वास्थ्य संघले स्वास्थ्य सेवामा कार्यरत अधिकृतस्तरदेखि माथिका सबै कर्मचारीको सरुवा, पदस्थापन संघीय सरकारबाट गर्न माग गरेको छ ।
स्वास्थ्य तथा जनसङ्ख्या मन्त्रालयले हालै सातवटै प्रदेशका सामाजिक विकासमन्त्रीमार्फत् प्रदेश मुख्यमन्त्रीको कार्यालयबाट दशौँ तहसम्मका कर्मचारीको सरुवा तथा पदस्थापन गर्नसक्ने अधिकार प्रत्यायोजन गरेको थियो । संघका महासचिव महेश्वर श्रेष्ठद्वारा जारी विज्ञप्तिमा लोकसेवा आयोगको प्रक्रियामार्फत् प्रवेश गरेका अधिकृतस्तरमाथिका कर्मचारीलाई संघीय सरकारबाट नै खटनपटनमा रहने गरी संघ, प्रदेश र स्थानीय तहमा खटाउने प्रावधान सुनिश्चित गर्न आग्रह गरिएको छ ।
हालको स्वास्थ्य सेवाका कर्मचारी समायोजन प्रक्रियामा कर्मचारीको वृत्ति विकासका अवसरहरूमा एकरूपता नभएको, सरुवा तथा बढुवाको अवसर साँघुरो भएको र कर्मचारीको मनोबलमा कमी हुँदै गएको विज्ञप्तिमा जनाइएको छ ।
-1732776560.jpg)
