झापा : रिडर्स झापाको आयोजनामा प्रत्येक दुई वर्षको अन्तरालमा आयोजना हुँदै आएको कला साहित्य उत्सव यही फागुन १८ गतदेखि सुरु हुने भएको छ ।
झापाको मेचीनगर- ६ स्थित काँकडभिट्टामा हुने ‘कला साहित्य उत्सव- २०७५’ मा १४ विषयमा समूहगत छलफल गरिने बिहीबार विर्तामोडमा पत्रकार सम्मेलन गरी रिडर्सले जानकारी दिएको हो ।
फागुन २० गतेसम्म सञ्चालन गरिने यस उत्सवको चौथो शृङ्खलामा प्यानल डिस्कसनसहित कला प्रदर्शनी, प्रत्यक्ष चित्रकला, आर्ट क्विज र फोटो प्रदर्शनी एवं नाटक मञ्चन गरिने कार्यक्रमका संयोजक हरि तिम्सिनाले जानकारी दिए ।
आयोजक समितिका सदस्य दामोदर ढुङ्गेलले कला साहित्य उत्सव लेखक र साहित्यकारका लागि मात्र लक्षित नगरी विद्यार्थी एवं सार्वजनिक चर्चाका विषयमा रुचि राख्ने सबैका लागि भएको बताए ।
उत्सवमा कला, साहित्य, संस्कृति, अर्थ-राजनीति, सञ्चार एवं पर्यावरण जस्ता विषयमा विमर्श गरिने आयोजक संस्थाका सचिव सौरभ मैनालीले जानकारी दिए ।
