काठमाडौं । नेपाली कांग्रेसका प्रवक्ता डा. प्रकाशशरण महतले पार्टीभित्र नयाँ नेतृत्व चाहिने माग उठाउने महामन्त्रीद्वय गगनकुमार थापा र विश्वप्रकाश शर्मालाई अहिले महाधिवेशनको तालिका ल्याउने समय नभएको बताएका छन्।
बीपी चिन्तन प्रतिष्ठानद्वारा आयोजित वर्तमान राजनीतिक अवस्थासम्बन्धी कार्यक्रमलाई सम्बोधन गर्दै उनले अहिलेको प्राथमिकता निर्वाचन तयारी हुनुपर्ने बताए।
महतले यसअघि भएका उपनिर्वाचनमा दुई महामन्त्रीहरूको नेतृत्वमा पनि पार्टीका उम्मेदवार पराजित भएको प्रसंग उल्लेख गर्दै प्रश्न उठाए,
“पार्टीमा नयाँ अनुहार चाहियो? कुन अनुहार चाहिने? कुन चाहियो?” उनले दुई महामन्त्रीतर्फ इङ्गित गर्दै भने, “उपनिर्वाचनमा देखेकै हो नि। अहिले त मिलेर काम गर्ने बेला हो। पार्टीलाई सुदृढ बनाउने र आगामी निर्वाचनका लागि तयारी गर्ने समय हो।”
उनका अनुसार, अहिले केन्द्रीय समितिको बैठकले आगामी निर्वाचनमा कसरी जाने भन्ने विषयमा निर्णय गर्नुपर्छ।
महतले महामन्त्री थापाले १५औँ महाधिवेशनको तालिका तत्काल ल्याउनुपर्ने भनाइबारे पनि प्रश्न उठाउँदै भने,
“अहिल्यै तालिका किन ल्याउने? त्यसको आवश्यकता अहिले किन पर्यो मैले बुझ्न सकेको छैन। मेरो त केही स्वार्थ छैन, तर म पार्टीको चिन्ता गर्ने मान्छे हुँ, धेरैले त्यो कुरा बुझ्दैनन्।”
प्रकाशित मिति: बुधबार, कात्तिक १३, २०८२
