काठमाडौं पूर्वप्रधानमन्त्री डा. बाबुराम भट्टराईले जेनजी आन्दोलनको वास्तविक नेतृत्व र प्रतिनिधिहरू स्पष्ट रूपमा पहिचान गर्न अन्तरिम सरकारलाई आग्रह गरेका छन्।
शनिबार सामाजिक सञ्जालमार्फत उनले भनेका छन्, “असफलता टुहुरो भए पनि सफलताका सयजना पिता हुन्छ भन्ने भनाइ अहिले पनि सान्दर्भिक छ।” उनका अनुसार भदौ २३ गतेदेखि औपचारिक रूपमा जेनजी आन्दोलनको पहल गर्ने र सडकमा नेतृत्व गर्ने व्यक्तिहरूलाई नै मुख्य प्रतिनिधि मानिनु पर्छ, भने पछि सहभागी हुनेहरू सहयोगीको रूपमा लिनु उपयुक्त हुन्छ।
भट्टराईले अन्तरिम सरकारलाई चार सुझाव दिएका छन्—
१. आन्दोलनका वास्तविक नेतृत्व र प्रतिनिधिहरूको सही पहिचान गर्नु,
२. आन्दोलनको ऐतिहासिक उद्देश्य पूरा गर्न दत्तचित्त भएर काम गर्नु,
३. गलत हर्कत गर्ने वा प्रतिगामी नारा दिनेहरूलाई यथोचित व्यवहार गर्नु,
४. विद्रोहको परिणामबारे स्पष्ट दृष्टिकोणसहित सावधानीपूर्वक अघि बढ्नु।
उनका अनुसार, आन्दोलनको दिशा र उद्देश्य स्पष्ट नगरी हतारमा निर्णय गर्दा आन्दोलनको सार कमजोर हुन सक्ने जोखिम रहन्छ। उनले भने, “जेनजी विद्रोहलाई यसको ऐतिहासिक परिवर्तनकारी लक्ष्यसम्म पुर्याउन अहिलेको सरकार जिम्मेवार र संवेदनशील हुनुपर्छ।”
प्रकाशित मिति: शनिबार, असोज २५, २०८२
