काठमाडौं । राष्ट्रपति रामचन्द्र पौडेलको स्वास्थ्यमा समस्या देखिएपछि आज (शनिबार) तय गरिएको जेनजी प्रतिनिधिहरूसँगको वार्ता स्थगित भएको छ। बैठक अब आउँदो सोमबारका लागि सारिएको शीतलनिवास स्रोतले जनाएको छ।
राष्ट्रपतिसँग भेट र संवाद हुन नसकेको भन्दै जेनजी अभियानका युवाहरूले शीतलनिवास अगाडि नाराबाजी गरेका छन्। उनीहरूले निर्धारित समयमा वार्ता नहुनुमा असन्तुष्टि जनाउँदै तत्काल संवादको मिति स्पष्ट गर्न माग गरेका छन्।
यसअघि राष्ट्रपति पौडेलले शुक्रबार प्रधानमन्त्री सुशीला कार्की र प्रमुख राजनीतिक दलका नेताहरूसँग आगामी निर्वाचन तयारीबारे विस्तृत छलफल गरेका थिए।
शीतलनिवासका अनुसार अहिले पनि राष्ट्रपति पौडेल प्रधानमन्त्री कार्की र मन्त्रीहरूसँग परामर्शमा व्यस्त रहेका छन्।
प्रकाशित मिति: शनिबार, असोज २५, २०८२
