काठमाडौं । प्रधानमन्त्री सुशीला कार्कीले भविष्यको नेपाल निर्माणमा जेनजी पुस्तालाई अर्थपूर्ण सहभागिता दिलाउन नयाँ संयन्त्र स्थापना गर्ने घोषणा गरेकी छिन् ।
जेनजी आन्दोलन सुरु भएको एक महिना पूरा भएको अवसरमा बिहीबार जारी भिडियो सन्देशमार्फत उनले सबैलाई संयम अपनाउन र हिंसाको चक्र अन्त्य गर्न आग्रह गरिन् ।
प्रधानमन्त्री कार्कीले भनिन्, “भविष्यको नेपाल निर्माणमा जेनजीलाई अर्थपूर्ण रूपमा सहभागी गराउन नयाँ संयन्त्र स्थापना गर्नेछौं । आजको यो कठिन समयमा हामी सबैले संयम राखी राष्ट्रिय एकता र सद्भाव कायम राख्न आवश्यक छ ।”
उनले देशमा देखिएका घटनाहरूलाई नयाँ नेपाल निर्माणको जगको रूपमा लिनुपर्ने उल्लेख गर्दै पुराना राजनीतिक दलहरूलाई पनि आत्मसुधार गर्न सुझाव दिइन् ।
“हामी सबैले आफ्नो कमजोरी र गल्ती स्वीकार गर्नुपर्छ । युवा पुस्ताले चाहेको परिवर्तनप्रति हाम्रो सरकार प्रतिबद्ध छ, र हामी नयाँ दिशातर्फ अघि बढिरहेका छौं,” प्रधानमन्त्री कार्कीले भनिन् ।
उनका अनुसार, आगामी निर्वाचनपछि पनि युवाप्रति सरकारको प्रतिबद्धता निरन्तर रहनेछ ।
प्रकाशित मिति: बिहीबार, असोज २३, २०८२
