काठमाडौं । नेकपा एमालेका अध्यक्ष केपी शर्मा ओलीले जेनजी विद्रोहमाथि भएको सरकारी दमनबारे छानबिन गर्न बनेको गौरीबहादुर कार्की नेतृत्वको आयोगलाई अस्वीकार गर्ने घोषणा गरेका छन्।
भक्तपुरको गुन्डुमा आयोजित कार्यक्रममा बोल्दै ओलीले उक्त आयोग र त्यसले तयार पार्ने प्रतिवेदन एमालेका लागि स्वीकार्य नहुने स्पष्ट पारे। उनले भने, “पहिले नै केपी ओलीलाई समात्नुपर्छ, थुन्नुपर्छ भन्ने मान्छेहरुको आयोग बनाएर छानबिन गर्ने, प्रतिवेदन दिने र त्यसको आधारमा नाटक गर्ने? यस्ता नाटक नेकपा एमालेलाई मान्य छैन।”
सरकारले २३ भदौमा भएको जेनजी विद्रोहमाथिको सरकारी दमनबारे छानबिन गर्न कार्कीको अध्यक्षतामा आयोग गठन गरेको थियो। तर, आयोग गठन भएको सुरुदेखिनै कार्कीले सामाजिक सञ्जालमा लेखेका स्टाटसका कारण एमाले र यसको नेतृत्व असन्तुष्ट बनेको छ।
ओलीले कार्कीप्रति नैतिकताको प्रश्न उठाउँदै भने, “आयोगमा नाम टुङ्गिनुअघि नै निष्पक्षताको शंका उठिसकेको थियो। यस्तो अवस्थामा नैतिक जिम्मेवारी लिएर राजीनामा दिनुपर्ने होइन र? विरोधी पक्षबाट निष्पक्षता अपेक्षा गर्नु सम्भव छैन।”
प्रकाशित मिति: बिहीबार, असोज २३, २०८२
