काठमाडौं । नेकपा एमालेका नेता महेश बस्नेतले देशमा व्यवस्था परिवर्तन भए पनि अवस्था परिवर्तन भएन भन्ने प्रचार अभियान कांग्रेस महामन्त्री विश्वप्रकाश शर्माबाट सुरु भएको दाबी गरेका छन् ।
बुधबार पार्टी कार्यालय च्यासलमा आयोजित पत्रकार सम्मेलनमा उनले यो राजनीतिक भाष्यलाई माओवादी केन्द्रका अध्यक्ष पुष्पकमल दाहाल ‘प्रचण्ड’ले थप बल दिएका आरोप लगाए ।
बस्नेतले भने, “विश्वप्रकाशजीले ‘केही भएन’ भन्ने कथा शुरू गर्नुभयो, त्यसमा प्रचण्डजीले घ्यू थप्नुभयो । यसरी जनतामाझ भ्रमको खेती गरिएको हो ।”
उनका अनुसार, मुलुक स्वाभाविक रूपमा अगाडि बढिरहे पनि केही नयाँ राजनीतिक शक्तिहरूले “नो नट अगेन” जस्ता नारा लिएर जनतालाई पुनः अस्थिरतामुखी बनाउन खोजेका छन् ।
नेता बस्नेतले हालैको २३ र २४ गतेको जेनजी आन्दोलनसमेत योजनाबद्ध रूपमा हाइज्याक भएको दाबी गर्दै त्यसका पछाडि “राजनीतिक स्वार्थ र भ्रम फैलाउने शक्ति” रहेको टिप्पणी गरे ।
प्रकाशित मिति: बुधबार, असोज २२, २०८२
