काठमाडौं । नेकपा एमालेका पोलिटब्यूरो सदस्य महेश बस्नेतले साइबर अपराधसम्बन्धी मुद्दामा केन्द्रीय साइबर ब्यूरो भोटाहिटीमा डेढ घण्टासम्म लिखित बयान दिएका छन्।
जिल्ला सरकारी वकिल कार्यालय काठमाडौंको निर्देशनपछि ब्यूरोले उनलाई बयानका लागि बोलाएको थियो। निर्देशनअनुसार बस्नेत बुधबार बिहान ब्यूरो कार्यालयमा उपस्थित भएर लिखित बयान दिएका हुन्।
ब्यूरोका प्रवक्ता एसपी दीपक राज अवस्थीका अनुसार, ‘उहाँले बयान दिइसक्नुभएको छ। यो सरकारी वकिलको निर्देशनअनुसारको नियमित प्रक्रिया हो।’
ब्यूरो स्रोतका भनाइमा, बस्नेतले सरकारी वकिल कार्यालयले पठाएका प्रश्नहरूको लिखित रूपमा जवाफ दिएका छन्। उक्त कार्यालयले ब्यूरोलाई तीनवटा काम गर्न निर्देशन दिएकोमा, बयान लिने प्रक्रिया पूरा भइसकेको र बाँकी दुई काम सम्पन्न भएपछि प्रतिवेदन बुझाइने जनाइएको छ।
स्रोतका अनुसार, बस्नेतले अधिकांश प्रश्नमा इन्कारी (अस्वीकार) बयान दिएका छन्।
बस्नेतविरुद्ध शोभा पाठकले उजुरी दिएको विषयमा लामो समयदेखि अनुसन्धान अघि नबढेपछि केही दिनअघि सरकारी वकिल कार्यालयले साइबर ब्यूरोलाई पुनः अनुसन्धानको निर्देशन दिएको थियो। सोही निर्देशनअनुसार बुधबार ब्यूरोले बस्नेतलाई बोलाएर बयान लिएको हो।
प्रकाशित मिति: बुधबार, असोज २२, २०८२
