काठमाडौं । नेकपा (एमाले) का महासचिव शंकर पोखरेलले देशमा निर्णायक राष्ट्रिय शक्ति निर्माणको आवश्यकता झन् बढेको बताएका छन् । उनले हालको राजनीतिक परिस्थिति नयाँ चुनौतीपूर्ण चरणमा प्रवेश गरेको बताउँदै त्यसको सामना गर्नुको विकल्प नभएको बताएका छन् ।
महासचिव पोखरेलले सामाजिक सञ्जालमा लेखेका छन्,
“निर्णायक राष्ट्रिय शक्ति निर्माणको औचित्य अझ बढेर गएको छ । राष्ट्रसामु नयाँ चुनौती अवश्य थपिएका छन्, तर सामना गर्नुको विकल्प छैन ।”
एमालेले लामो समयदेखि दुई दलीय शासन प्रणाली को वकालत गर्दै आएको छ । पार्टीको नेतृत्व तहका विभिन्न कार्यक्रमहरूमा महासचिव पोखरेलले “स्थिरता र स्पष्ट नीति” का लागि दुई ठूला राजनीतिक दलको संयोजन आवश्यक रहेको धारणा व्यक्त गर्दै आएका छन् ।
उनका अनुसार, “जति धेरै पार्टी, त्यति धेरै अस्थिरता र झै–झगडा” भएकाले अब देशलाई दुई दलीय लोकतान्त्रिक प्रणालीतर्फ लैजान जरुरी छ ।
८ असार २०८१ मा गृह जिल्ला दाङमा आयोजित कार्यक्रममा पोखरेलले भनेका थिए, “एमालेको अबको बाटो निर्णायक राष्ट्रिय शक्ति निर्माण र दुई दलीय प्रणाली हो ।”
यस्तै विचार उनले १५ फागुन २०७८ मा एमाले दोलखा–काठमाडौं सम्पर्क मञ्चको सम्मेलनमा पनि व्यक्त गरेका थिए ।
हालैको जेनजी आन्दोलनपछि बदलिएको राजनीतिक परिस्थितिमा पनि पोखरेलले आफ्नो अडान दोहोर्याउँदै निर्णायक राष्ट्रिय शक्ति निर्माणको औचित्य झन् प्रस्ट भएको बताएका छन् ।
प्रकाशित मिति: बुधबार, असोज २२, २०८२
