काठमाडौं । आगामी फागुन २१ गतेका लागि तोकिएको निर्वाचनको विस्तृत कार्यतालिका निर्वाचन आयोगले सार्वजनिक गरेको छ।
आयोगका प्रवक्ता नारायणप्रसाद भट्टराईका अनुसार, आज आयोगको बैठकले निर्वाचनका सबै तयारीलाई समयबद्ध रूपमा अघि बढाउन कार्यतालिका स्वीकृत गरेको हो।
स्वीकृत कार्यतालिका अनुसार, निर्वाचन प्रयोजनका लागि राजनीतिक दल दर्ता मंसिर १ गतेदेखि १० गतेसम्म गरिनेछ। यसअघि नै दर्ता प्रमाणपत्र लिइसक्नुपर्ने व्यवस्था अनुसार २०८२ कात्तिक ३० गतेभित्र दलले आयोगबाट प्रमाणपत्र प्राप्त गरिसक्नुपर्नेछ।
त्यसपछि माघ २ गतेदेखि निर्वाचन अधिकृतको कार्यालय स्थापना गरिनेछ।
प्रचारप्रसारका लागि फागुन ३ गतेदेखि १८ गतेसम्मको समय तोकिएको छ भने त्यसपछि प्रचार निषेध अवधि लागू हुनेछ। मतदान फागुन २१ गते बिहान ७ बजेदेखि बेलुका ५ बजेसम्म हुनेछ।
समानुपातिक प्रणालीअन्तर्गत मंसिर १५ गतेदेखि निर्वाचन अधिकृतको कार्यालय सञ्चालनमा आउनेछ। बन्दसूची पेस गर्ने मिति पौष १८ र १९ गते निर्धारण गरिएको छ।
आयोगले राजनीतिक दलहरू, सरोकारवाला निकाय र साझेदार संस्थासँग समय समयमा परामर्श र समन्वय गर्दै निर्वाचन प्रक्रिया अगाडि बढाइने जनाएको छ।
विज्ञप्तिमा भनिएको छ, “निर्वाचनमा भाग लिन चाहने दलहरूले तोकिएको मितिभित्रै आयोगमा दर्ता प्रक्रिया पूरा गरी प्रमाणपत्र लिइसक्नुपर्नेछ, अन्यथा उनीहरूले निर्वाचन प्रयोजनका लागि दल दर्ता गर्न नपाउनेछन्।”
प्रकाशित मिति: सोमबार, असोज २०, २०८२
